Өөрийгаа АН-ын дарга гэж нэрлэсэн УИХ-ын гишүүн О.Цогтгэрэл өчигдөр нэгэн цочир мэдэгдлийг хийв. АН байгуулагдсан өдрийг тохиолдуулан уламжлал ёсоор С.Зоригийн хөшөөнд цэцэг өргөнгөө тэр нөхөр "Төр нийгмийн зүтгэлтэн С.Зориг агсны дурсгалыг хүндэтгэж Монгол Улсын баатар цолоор нэхэн шагнах" санаачилга гаргав. Иргэдийн саналыг цуглуулан Ерөнхийлөгчид өргөн барих гэнэ. Хэрэв Х.Баттулга нь өөрт ашигтай гэж үзвэл иргэдийн санал байсан байгаагүй олгочих байх л даа.

Гэвч энд нэг муухай, увайгүй зүйл байна. Учир нь С.Зоригийн аллагын хэрэг одоо хэр нь бүрэн илрээгүй байгаа. Хэргийн гүйцэтгэгч буюу аллага үйлдсэн этгээдийг барьж шоронд хийсэн боловч хэргийн захиалагчийг илрүүлээгүй байгаа байгаа. Тэр байтугай хэргийг илрүүлэх үүрэгтэй Хууль зүйн сайд, Ерөнхий сайд нар шоронд хоригдож байгаа хэргийг гүйцэтгэгч нарыг суллахыг шаардан улс төрийн элдэв акциуд хийх болсон. Хэрвээ тэднийг шоронгоос суллаж гэмээн хэргийн захиалагчийн ул мөрийг баллахын тулд өөрсдийг нь үгүй хийж ч мэдэхээр нөхцөл байдал бий болоод байгаа. 

Ийм байхад УИХ-ын гишүүн О.Цогтгэрэл үгүй болоод 23 жил болсон хүний нэрийг худалдаж идэхээр гэнэт шийдсэн нь хэтэрхий увайгүй үйлдэл болов. Хэн нэгнийг худалдаж идэхийн тулд ядаж өөрт нь хүн чанар гаргах хэрэгтэй. Тэр нь энэ тохиолдолд аллагын гэм буруутныг олж шийтгэх явдал. Гэтэл үүний төлөө нэг ч үг дуугараагүй, харин ч эрх баригч намын хийж буй бусармаг үйлдлийг үг дуугүй хүлээн зөвшөөрч явсан энэ хүн гэнэт С.Зориг агсанд Баатар цол нэхэн шагнах санаа сэдсэн нь их л муухай доромж утгатай сонсогдож байна.

Тиймээс хэрвээ С.Зоригийн нэрийг ашиглаж намынхаа гишүүдээс, олон нийтээс оноо авахыг хүсч байгаа бол эхлээд энэ хэргийг илрүүлэхгүйн төлөө хорь гаруй жил зүтгэсэн, одоо ч зүтгэсээр байгаа Ц.Нямдорж гэдэг хүнийг эхлээд улс төрөөс зайлуул. Тэгсний дараа сая талийгаачийн сүнс амирлаж, хэргийн зангилаа ч тайлагдаж мэдэх юм.

Ц.Нямдоржийн өдий болтол улс төрөөс явж чадахгүй байгаа цорын ганц шалтгаан нь С.Зоригийн аллагын захиалагчийг илрүүлэхгүй байх. Ганц энэ хэргээр намынхнаа шантаажлан Монголын төрд хатиг шиг наалдсан хүн...

Б.ЗАЯА