АН-ын дотоод сонгуулийн хорооны дарга асан И.Мөнхжаргал Ардчилсан намын даргын сонгуулийн цаасаар явуулсан санал хураалтын дүнг танилцууллаа. 

И.Мөнхжаргал:

-"Одоогоор сонгуулийн урьдчилсан дүн мэдээ нэгтгэгдэж дуусаад байна. Нэгдсэн дүнг 48 цагийн дотор гаргаж, АН-ын Их хуралд өргөн барина. 

Урьдчилсан дүнгээр:

-О.Цогтгэрэл 41,199

-О.Амартүвшин 16,075

-С.Эрдэнэболд 8,928

-Д.Пүрэвдаваа 6,041 хүний санал тус тус авсан.

Санал хураалтад 74,908 гишүүн саналаа өгсөн нь нийт сонгогчдын 46.9 хувь байна" гэв.

-С.Эрдэнэ даргатай Ардчилсан нам М.Тулгатыг намын даргаар сонгогдсон гэж зарласан. Цаашид ямар процесс явах вэ?

-АН-ын даргын сунгаанд хамгийн өндөр санал авсан хүнийг намын Их хуралд өргөн мэдүүлж, ёсчлон батлуулах ёстой. Манай сонгуульд 74,908 хүн ирж саналаа өгсөн. Үүнээс илүү баталгаа байхгүй. УДШ-эд намын даргаа бүртгүүлэхэд ямар нэгэн зөрчилгүй гэж үзэж байна. Нөгөө талын явуулсан сонгууль дүрмийн бус. Захиргааны хэргийн шүүхэд тамганы маргаан явж байгаа. С.Эрдэнэд тамга олгосон асуудлыг түдгэлзүүлэх шийдвэр гарч, давж заалдах шатанд яваа.