АН-ын тамгыг гардаж авах намын шинэ даргыг сонгох сонгууль өнөөдөр болж байна. Өглөө 10.00 цагт эхэлсэн сонгуулийн санал хураалт оройн 22.00 цагт өндөрлөнө. Санал хураалтын дүнд хамгийн өндөр санал авсан нэр дэвшигчийг АН-ын Их хурлаас намын даргаар батламжлах ёстой.

Гэвч харамсалтай нь тус намын даргыг сонгох сонгууль хоёр тусдаа зарлагдаж, хоёр тусдаа санал хуралт явуулж байна. АН-ын дарга С.Эрдэнэ, тус намын ҮБХ-ноос томилсон Дотоод сонгуулийн хорооноос зохион байгуулж буй цахим сонгуульд УИХ-ын гишүүн асан Ц.Оюунгэрэл, Л.Гүндалай, Ч.Өнөрбаяр, М.Тулгат, Ц.Уртнасан нар өрсөлдөж байгаа. Хэрэв таван нэр дэвшигчийн аль нэг нь намын гишүүдийн олонхийн саналыг авч чадахгүй бол сонгуулийг хоёр шаттай явуулж, хамгийн олон санал авсан хоёр нэр дэвшигч дээр дахин санал хураалт явуулах журамтай.

Харин намын даргын үүрэг гүйцэтгэгчээр ажиллаж байсан Ц.Тувааны зарласан сонгуульд УИХ-ын гишүүн О.Цогтгэрэл, МҮХАТ-ийн тэргүүн О.Амартүвшин, С.Эрдэнэболд, Нийслэлийн АН-ын дарга асан Д.Пүрэвдаваа нар өрсөлдөж байгаа. Мөн тэдгээр нэр дэвшигчдэд өгөх намын гишүүдийн саналыг цаасаар буюу уламжлалт аргаар авч байна.

Түүнчлэн УОК-ийн шийдвэрээр халдварын өндөр тархалттайд тооцогдож буй зарим аймагт /Өмнөговь, Дорноговь, Архангай, Баянхонгор, Дархан-Уул, Дорноговь, Завхан, Орхон, Өвөрхангай, Увс/ хорио цээрийн дэглэмийн зэргийг ахиулж "улаан" түвшинд шилжүүлсэнтэй холбоотойгоор өчигдөр урьдчилсан санал хураалт явуулсан байна.

Урьдчилсан санал хураалтын дүнг өнөөдөр бусад аймагт явуулсан санал хураалттай хамтад нь танилцуулах юм.