УИХ-ын гишүүн Б.Пүрэвдорж Төрийн ордонд мэдээлэл хийлээ. Тэрээр Монгол Улсын Ерөнхийлөгчийн сонгуулийн тухай хууль Ардчилсан намын дүрмийн эсрэг хийгдсэн хэмээн мэдэгдлээ.

УИХ-ын гишүүн Б.Пүрэвдорж "Өнгөрсөн баасан гаригт миний бие АН-ын хоёр талд байгаа нөхдүүдийг уулзаж, зөвшилцөх санал гаргасан. Харимсалтай нь өнгөрсөн өдрүүдэд уулзалт хийх саналд хариу хэлсэнгүй. 

Нэг зүйлийг хариуцлагатайгаар сануулж хэлэхэд дарга нар өнөөдөртөө эрх мэдэлтэй байж болно. Гэхдээ намын гишүүдэд бүх эрх мэдэл байгаа гэдгийг сануулж хэлмээр байна.

Монгол Улсын Ерөнхийлөгчийн сонгуулийн хууль бол манай намын дүрмийн эсрэг санаатайгаар хийсэн хууль байгаа. Тийм учраас манай нам Ерөнхийлөгчийн сонгуулийн хуулийн хайчинд байгаа гэдгээ ямагт санаж ажиллах ёстой. Ерөнхийлөгчийн сонгуулийг баталж байхад хугацаа нь хэтэрхий давчуу байна гэдгийг удаа дараа илэрхийлж байсан ч МАН санаатайгаар баталсан.

Хуулийн ямар хайчинд байгааг тодруулж хэлье. Ерөнхийлөгчийн сонгуульд нэр дэвшүүлэх хугацаа улс орон даяар гуравхан хоногийн хугацаанд өрнөнө. МАН бол дарга нараасаа сонгочихно. Манай нам бол жирийн гишүүдээсээ сунгаагаар сонгодог дүрэмтэй. Тэгэхээр дөрөвдүгээр сарын 30-ны өглөөгүүр намын нэр дэвшигчдийнхээ материалыг авна. Өдөр нь Дотоод сонгуулийн хороо нэр дэвшигчдээ бүртгэнэ. Үдээс хойш нь нэр дэвших эрхээ авсан хүмүүс мөрийн хөтөлбөрөө танилцуулна. Ингээд маргааш өдөр нь сунгааны санал хураалт явагдана. Нөгөөдөр нь намын Их хурал хуралдаад нэр дэвшигчийг батламжилна. Ийм гуравхан хоногтой. Энэ бол манай намын дүрмийн эсрэг хийгдсэн зүйл.

Ингээд Тавдугаар сарын 2-5-ны хооронд нэр дэвших эрхээ авсан нэр дэвшигчийнхээ материалыг нам СЕХ‑нд өгнө. Харин СЕХ гурав хоногийн хугацаанд нэр дэвшигчийг бүртгэх эсэхээ шийдвэрлэнэ. Хэрэв татгалзсан тохиолдолд тухайн хүний материалыг засах хоёрхон хоногийг хугацаатай. Сонгуульд нөхөн нэр дэвших тухай асуудал огт байхгүй. Зөвхөн нэр дэвшигч нас барах эсвэл шүүхээр шийтгэгдсэн тохиолдолд нөхөн нэр дэвшүүлнэ. Өөр нөхөн нэр дэвшүүлэх тухай асуудал байхгүй. 

Үүний цаана юу байгааг би тодорхой хэлье. 

Маргалдагч талууд МАН-ын мэхэнд орж байна шүү дээ. Манай нам хоёр болоод, хоёр тамгатай болоод, хоёр нэр дэвшигчийг СЕХ-нд өгөх юм бол СЕХ хоёр материалын аваад У.Хүрэлсүх дээр очно. Тэгээд У.Хүрэлсүх муугийн таална. Ингээд манай нам нэр дэвшүүлэх эрхтэй болно. Хоюуланг нь таалахгүй гэвэл манай нам Ерөнхийлөгчийн сонгуульд орж чадахгүй. Яагаад гэвэл СЕХ танай нам нэг нь тамгатай, нэг цахим бүртгэлд бүртгүүлээгүй байна гэдэг шалтгаанаар хасна. 

Ийм хуулийн хайчинд явж байгаа нөхдүүд өнөөдөр намын дарга тодруулна гэж зүтгэсэн хэвээр байна. 

Олон хүмүүс энэ хуулийг мэдчихээд мэдээгүй юм шиг зүтгэж байгаад харамсаж байна. Өнөөдөр та бүхэн гишүүдээ хишгэчээд явж болно. Гэхдээ эргүүлээд намын гишүүд хариуцлага тооцох болно шүү" гэлээ.