Үндсэн хуулийн Цэцийн Бага суудлын хуралдаан өнөөдөр хуралдаж, Үндсэн хуулийн Цэцийн гишүүн Д.Солонгын иргэний ирүүлсэн мэдээлэл дээр үндэслэн маргаан үүсгэх тогтоолыг хэлэлцэж, хүчингүй болгожээ.

Тодруулбал, УИХ-ын гишүүн Т.Доржханд, Д.Үүрцайх, МУИС-ийн багш О.Мөнхсайхан нарын дөрвөн иргэн Монгол Улсын Ерөнхийлөгч Х.Баттулга 2021 оны Ерөнхийлөгчийн сонгуульд өрсөлдөх боломжгүйг хуульд тусгах ёстой хэмээн маргаан үүсгэсэн байдаг.

Тэгвэл өнөөдөр мэдээллийн хэрэгслүүдээр "Ерөнхийлөгч Х.Баттулга нэр дэвших эрхтэй гэж ҮХЦ шийдвэрлэжээ" гэсэн мэдээлэл гараад байна. 

Мэдээлэлд "Нэр бүхий иргэд Монгол Улсын Ерөнхийлөгчийн сонгуулийн тухай хуульд “…өмнө нь Ерөнхийлөгчөөр сонгогдон ажилласан иргэнийг бүртгэхгүй байх…” шаардлагыг тусгалгүй орхигдуулсан нь Үндсэн хууль зөрчсөн байна хэмээн ҮХЦ-д мэдээлэл гаргасан билээ.

Үүний дагуу ҮХЦ-ийн гишүүн Д.Солонго маргаан үүсгэсэн бол ҮХЦ-ийн гишүүн Ц.Нанзаддорж маргаан үүсгэх ёсгүй гэсэн юм.

Тэгвэл өнөөдөр ҮХЦ-ийн Бага суудлын хуралдаан үргэлжилж,Т.Доржханд, Д.Үүрцайх нарын нэр бүхий иргэдийн мэдээллийн дагуу маргаан үүсгэсэн Цэцийн гишүүн Д.Солонгын шийдвэрийг хүчингүй болгож, Ерөнхийлөгч Х.Баттулга ирэх Ерөнхийлөгчийн 2021 оны сонгуульд нэр дэвших эрхтэй болохыг тогтоосон шийдвэр гарчээ" гэсэн байна.

Энэ талаар Хуульч, өмгөөлөлч Б.Мэргэн өөрийн сошил хуудаснаа ийн тайлбарлажээ.

Тэрээр "Үндсэн хуулийн Цэцээс ерөөсөө ийм шийдвэр гаргаагүй. Ерөнхийлөгчийн сонгуулийн хуульд дэвших эрхгүй гэж хуульчлаагүй байна гэж Цэцэд гаргасан мэдээллээр маргаан үүсгэхгүй л гэсэн.

Маргаан үүсгэхгүй гэсэн нь дэвших эрхтэй гэж шийдсэн гэсэн үг огт биш буюу энэ талаар Цэц ямар нэг шийд гаргаагүй. Үндсэн асуудлыг хэлэлцээгүй. Маргаан үүссэн бол асуудлыг хэлэлцэж байж шийднэ. Өөрөөр хэлбэл хэлэлцэх эсэхээ л шийдсэн. Тэгээд хэлэлцэхгүй болсон. Шал өөр ойлголтууд шүү" гэжээ.