Ерөнхий сайд асан Ж.Эрдэнэбат өнөөдөр УИХ-ын чуулганы нэгдсэн хуралдаанд оролцож, УИХ-ын гишүүний тангараг өргөлөө. 

Ж.Эрдэнэбат нь УИХ-ын сонгуулийн 13 дугаар тойрог буюу Сэлэнгэ аймгаас сонгогдсон боловч тухайн үед албан тушаалын гэмт хэрэгт холбогдон шалгагдаж, шүүхээс түүнд цагдан хорих таслан сэргийлэх арга хэмжээ аваад учир гишүүний тангарагаа өргөж, бүрэн эрхээ баталгаажуулаагүй байсан билээ. 

Сонгуулийн дараа буюу өнгөрөгч долдугаар сарын 6-нд Баянзүрх, Сүхбаатар, Чингэлтэй дүүргийн эрүүгийн хэргийн шүүхээс түүнд нийтийн албанд ажиллах эрхийг зургаан жилийн хугацаатай хасч, зургаан жилийн хорих ял оноож, давж заалдах шатны шүүх ялыг хэвээр үлдээсэн авч УДШ түүнд ял  оногдуулсан хоёр шатны шүүхийн шийдвэрийг хүчингүй болгож, хэргийг мөрдөн байцаалтад буцаасан билээ.

Энэ 3-нд Ж.Эрдэнэбатад авсан таслан сэргийлэх цагдан хорих арга хэмжээг өөрчлөн, батлан даалтад гаргасан, мөн гэм бурууг шүүхээр тогтоогоогүй байгаа тул өнөөдөр УИХ-ын нэгдсэн чуулганд оролцож, гишүүний тангаргаа өргөлөө.