АН-ын дараачийн даргыг тодруулах сунгаа хоёр тусдаа зарлагдаж, Дотоод сонгуулийн хороо болон намын зарим бүтэц хоёр тусдаа үйл ажиллагаа явуулсаар багагүй хугацаа өнгөрөв. АН-ын даргын үүрэг гүйцэтгэгчээр ажиллаж байсан Ц.Тувааны зарлаж, энэ сарын 4, 5-ны өдөр явуулсан сунгаанд 16 нэр дэвшигч бүртгүүлсэн бол өнөөдөр тэдний таваас бусад нь нэрээ татаад байгаа. 

Харин АН-ын дарга С.Эрдэнийн зарласан сунгаа өчигдөр буюу 15-ны өдрөөс нэр дэвшигчдээ бүртгэх ёстой байсан ч хойшлуулжээ. Учир нь тус намын гишүүд АН-ын удирдлагуудыг намаа хуваан сунгаа зарласан явдалд дургүйцлээ илэрхийлж, нэр дэвшигчдийн хувьд ч хоёрпмол байдал үүсээд байгаа учир намын удирдлагууд эвлэрлийн ширээнд суусан байна.

Мөн өчигдөр орой УИХ дахь АН-ын бүлгийн гишүүд АН-ын дарга С.Эрдэнэтэй уулзжээ. Уулзалтын үр дүнд хоёр тусдаа зарлагдсан сунгааг нэгтгэж нэг дор явуулахаар шийдвэрлэжээ. Тиймээс энэ сарын 19-ний өдөр сунгаанд нэр дэвшигчдийн шинэчилсэн бүртгэлийг хиж эхлэх юм байна. 

Сунгаанд оролцох нэр дэвшигчдийн хувьд хоёр талаас цөөнгүй хүн өрсөлдөх төлөвтэй байгаа бөгөөд сунгааг хоёр шаттай явуулахаар болжээ. Өөрөөр хэлбэл сунгаанд оролцохоор нэрээ дэвшүүлсэн бүх нэр дэвшигчдийг сунгаанд оролцуулан намын гишүүдээс санал хурааж, хамгийн их санал авсан хоёр нэр дэвшигчдийн дунд дахин санал хураалт явуулна.

Өмнөх удаа 2017 онд явуулсан сунгаанд таван нэр дэвшигч өрсөлдөж, хамгийн олон санал авсан С.Эрдэнэ намын даргаар томилогдсон авч энэ нь нийт гишүүдийн олонхийн саналыг авч чадаагүй гэдэг шүүмжлэлд өртөөд байсан билээ. Тиймээс энэ удаа хамгийн олон санал авсан хоёр нэр дэвшигчийг дахин өрсөлдүүлж, нийт гишүүдийн олонхийн саналыг авсан нэр дэвшигчийг АН-ын даргаар батламжлах юм байна.