Өнгөрөгч баасан гариг буюу 12-ны өдөр Монгол Улс COVAX хөтөлбөрийн хүрээнд КОВИД-19 цар тахлын эсрэг вакцины эхний хэсэг болох 14,400 хүн тун вакциныг хүлээн авсан билээ. Гэвч уг вакциныг хүлээн авсан Гадаад харилцааны яам энэ тухай албан мэдээндээ COVAX хөтөлбөрт нэгдсэн хандивлагч орнуудын тухай огт дурьдаагүй явдалд Европын холбооны Монгол дахь суурин төлөөлөгч дургүйцлээ илэрхийлсэн нь өнгөрсөн амралтын өдрөөр хэвлэлд нийтлэгдсэн билээ. Учир нь вакцин хангамжийн COVAX хөтөлбөрийг дэмжиж, хамгийн их санхүүжүүлилт хийсэн орнууд нь Европын холбоонд багтаж байгаа юм.

Тэгвэл өнөөдөр ГХЯ-ны Төрийн нарийн бичгийн дарга Н.Анхбаяр олон улсын вакцин хангамжийн COVAX хөтөлбөрт оролцогч Австрали, Америк, Болгар, Их Британи, Герман, Европын холбоо, Итали, Канад, Кувейт, Франц, Унгар, Хятад, Япон зэрэг донор орны Элчин сайд нар болон ДЭМБ, НҮБ-ын Хүүхдийн сангийн төлөөллийг хүлээн авч уулзжээ.

Уулзалтын эхэнд Төрийн нарийн бичгийн дарга Н.Анхбаяр "COVAX хөтөлбөрийн хүрээнд КОВИД-19 цар тахлын эсрэг вакцины эхний хэсэг болох 14,400 тунг гуравдугаар сарын 12-ны өдөр хүлээн авсантай холбогдуулан донор орнуудын Элчин сайд нарт" дахин талархал илэрхийлэв. Түүнчлэн тус хөтөлбөрийн хүрээнд хуваарийн дагуу олгох AstraZeneca, Pfizer вакцины үлдсэн хэсгийг ойрын хугацаанд нийлүүлэх талаар санал солилцсон байна.

Дашрамд сануулахад, олон улсын вакцин хангамжийн COVAX хөтөлбөрийг Австрали, Австри, Америк, Бельги, Их Британи, Бутан, Герман, Грек, Дани, Европын Холбоо, Ирланд, Итали, Исланд, Испани, Канад, Катар, Колумби, Кувейт, Люксембург, Монако, Нидерланд, Норвег, Өмнөд Солонгос, Саудын Араб, Сингапур, Финланд, Франц, Швед, Швейцар, Шинэ Зеланд, Эстони, Япон зэрэг улс болон төрийн бус 14 байгууллага, сан, корпорациас санхүүжүүлж байгаа юм.