Өнөөдөр АН-ын удирдлагууд цаг үеийн асуудлаар мэдээлэл хийлээ. 

АН-ын дэд дарга Ц.Оюундарь "Ардчилсан Намын даргыг сонгох сонгууль Дөрөвдүгээр сарын 25-ны өдөр цахимаар болох бөгөөд АН хууль ёсны даргатай болсныхоо дараа Ерөнхийлөгчид нэр дэвшигчийг тодруулна" гэлээ. 

Ардчилсан Намаас ардчилсан Ерөнхийлөгч гарах ёстой гэсэн байр суурьтай байгаа бөгөөд тусгай сонгуулийн багийг өчигдрөөс ажиллуулж эхэлжээ. 

Харин АН-ын Хууль зүйн асуудал эрхэлсэн нарийн бичгийн дарга О.Баасанхүү Ерөнхийлөгч Х.Баттулгыг 2021 оны Ерөнхийлөгчийн ээлжит сонгуульд АН-аас нэр дэвших боломжтой эсэх талаар тайлбар өгөв.

Тэрээр "Одоогийн Ерөнхийлөгч дахин сонгогдох сонирхолтой байхыг үгүйсгэхгүй. Гэхдээ Монгол Улсад хүчин төгөлдөр үйлчилж байгаа хуулиар нам урьдчилж нэр дэвшигчийг зарлахыг хориглосон. Нам хуулийн дагуу гурав хоногийн хугацаанд нэр дэвшигчээ зарлах ёстой. Ардчилсан нам Ерөнхийлөгчийн сонгуульд 50 нас хүрсэн, энэ намаас нэр дэвших сонирхолтой бүх хүнийг өрсөлдүүлж, хамгийн олон хүний санал авсан хүнийг зарлана. Тиймээс Ерөнхийлөгч Х.Баттулга өрсөлдөх хүсэлтээ гаргавал бид дотоод сонгуульд нэрийг нь оруулаад явна” гэв.