Ардчилсан намд өрнөж буй үйл явд явдал ойлгомжгүй хэвээрээ байна. Өнөөдөр буюу 2021 оны гуравдугаар сарын 4-нд тус намын дарга С.Эрдэнийн Үндэсний Бодлогын Хорооны хурал зарлаж намынхаа дүрмийг өөрчлөх асуудлыг хэлэлцжээ. Тус өөрчлөлтөөр АН-ын дарга сонгуулийн дүнгээр огцордог заалтыг хүчингүй болгосон тухай эх сурвалж мэдээллээ. Товчоор хэлбэл, дүрмийн өөрчлөлт хүчин төгөлдөр болбол АН-ын даргаар С.Эрдэнэ улиран ажиллах боломжтой гэсэн үг.

Гэвч тус хуралд нийт ҮБХ-ны 380 гишүүнээс 130 орчим хүн цахимаар оролцжээ. Мөн намын дарга С.Эрдэнэ "ҮБХ-ны 195 гишүүн татвараа төлөөгүй учраас бүрэн эрх нь дууссан тул ирц хүрсэн" гэж үзсэн байна.

АН-ын экс дарга дахин дөрвөн жил улирхаар зүтгэж байхтай зэрэгцэн тус намын наяад оны залуус Пума зочид буудалд цуглан өнөөгийн нөхцөл байдал, гарах гарцын талаар нухацтай ярилцжээ. Уулзалтанд 80 гаруй ҮБХ-ны гишүүд оролсон байна. Залуус намын Дотоод Сонгуулийн Хорооны болон Үндсэн Дүрмийн Хорооны дарга нараас мэдээлэл авсан байна. Хэлэлцүүлгийн үр дүнд Дотоод Сонгуулийн Хорооноос зарласан энэ сарын 28-нд товлогдоод байгаа сонгуулийг санал нэгтэйгээр дэмжиж буйгаа илэрхийлсэн гэж эх сурвалж мэдээлэв. Залуус энэ удаагийн сонгуульд хяналт тавих бүтэц байгуулан Дотоод Сонгуулийн Хороотой хамтран ажиллахаар ярилцсан байна.

Харин тэдний дундаас намын даргад өрсөлдөх хүн байгаа эсэх нь тодорхойгүй, энэ удаагийн сонгуульд хэрхэн оролцох талаараа дахин ярилцахаар тохиролцсон байна. АН-ын залуусын нэгдэл л тус намын өнөөгийн хуваагдмал байдлыг өөрчилж чадна гэсэн намынхаа болон нийгмийн хүлээлтийг тэд хэрхэн хүлээж авахыг цаг хугацаа харуулах бизээ.

А.Цэцэг