Намрын ээлжит чуулганы сүүлийн өдөр УИХ-ын гишүүд Засгийн газрын гишүүнд нэр дэвшигчдээс асуулт асууж, үг хэллээ.

Сайд нарыг тангараг өргүүлснээр энэ удаагийн Намрын ээлжит чуулган хаалтаа хийнэ. 

Энэ үеэр зарим гишүүд ЗГХЭГ-ын даргаар томилогдож буй УИХ-ын гишүүн, ХЗДХ-ийн сайд асан Ц.Нямдоржид хандан хатуу үг чулуудлаа. 

УИХ-ын гишүүн Х.Болорчулуун "Сайд нараас асуугаад байх юм алга. Энэ 16 сайд дотроос нэг хүнийг үнэхээр гайхаж байна. Энэ бол Ц.Нямдорж сайд. Би Их хуралд орохоосоо өмнө Ц.Нямдорж сайдыг их шударга хүн гэж боддог байлаа. Гэтэл та миний бодож байснаас 180 градус зөрүүтэй хүн юм гэдгийг үг, үйлдэл бүхнээс тань ойлгосон. Одоо таны монгол төрөөс авах, монгол төрийн төлөх өр дуусаагүй юу?!

Би тантай Монгол Улсын баялаг, газрын тос, Дубайн гэрээ, Оюутолгойн гэрээтэй санал зөрдөг. Ялангуяа бид яагаад Оюутолгойг ашиглуулсныхаа төлөө өрөнд орж байна вэ. Та үүнийг улайран хамгаалж байсан. Бүр Монгол Улсын сайд биш Рио Тинтогийн сайд шиг аашилж, Английн хатан хааны өмч гэж ярьж байсныг чинь хүртэл монголчууд мартаагүй шүү.

Та сайдуудын сайд, ЗГХЭГ-ын даргын суудалд сууж байна. Бүх явах, ирэх бичиг боловсруулах ажил тантай холбоотой болно. Танд захиж хэлэхэд, сайдуудын ажилд, монгол төрийн ажилд бага шиг гай болоорой.

Л.Оюун-Эрдэнэ сайдын хамгийн эмзэг цэг ЗГХЭГ-ын дарга боллоо шүү. Таныг Ц.Нямдорж сайдыг кабинетдаа багтаасанд гайхаж байна" гэсэн юм.

Харин Ерөнхий сайд Л.Оюун-Эрдэнэ "ЗГХЭГ-ын даргаар Ц.Нямдоржийг би урьж ажиллуулж байгаа. 

Нэгдүгээрт, харьцангуй залуу хүмүүсээс бүрдсэн Засгийн газарт туршлагатай хүн хэрэгтэй байсан. Хоёрдугаарт, энэ Засгийн газар Эрдэнэтийн 49 хувьтай холбоотой асуудалд цэг тавьж, мухарлах ёстой гэж үзэж байгаа учир түүнийг танхимдаа урьсан" гэлээ.

Мөн тэрээр "Засгийн газар дөрвөн зорилтыг хэрэгжүүлнэ. Нэн тэргүүнд цар тахлыг даван туулахын төлөө хичээж ажиллана. Хамгийн түрүүнд вакцин оруулж ирэх тал дээр анхаарна. Засгийн газрын эхний 100 хоног дотор вакцин оруулж ирэх зорилт тавьсан. Вакцин ороод ирвэл амьдралын хэмнэлд өөрчлөлт орж, ААН-үүдийн зогсонги байдал өөрчлөгдөнө" хэмээн онцолсон билээ.