УИХ-ын өчигдөрийн чуулганы нэгдсэн хуралдаанаар Музейн тухай хуулийн төсөл болон хамт өргөн мэдүүлсэн бусад хуулийн төслүүдийн эцсийн хэлэлцүүлгийг хийж, УИХ-ын гишүүн Х.Ганхуяг Боловсрол, соёл, шинжлэх ухаан, спортын байнгын хорооны санал, дүгнэлтийг танилцуулсан юм.

Засгийн газраас 2020 оны тавдугаар сарын 1-ний өдөр өргөн мэдүүлсэн дээрх хуулийн төслүүдийн анхны хэлэлцүүлгийг Улсын Их Хурал 2021 оны нэгдүгээр сарын 20-ны өдрийн хуралдаанаараа хийж, эцсийн хэлэлцүүлэгт бэлтгүүлэхээр харьяалах Байнгын хороонд шилжүүлсэн. Нэгдсэн хуралдаанаар хуулийн төслүүдийн анхны хэлэлцүүлгийг явуулах үед Монгол УИХ-ын чуулганы хуралдааны дэгийн тухай хуулийн 42 дугаар зүйлийн 42.2.1-т заасны дагуу төслийн зарим зүйл, заалтыг гүйцээн боловсруулжээ. Монгол Улсын харьяат 16 хүртэлх насны хүүхэд музейн үзмэрийн танхимаар үнэ төлбөргүй үйлчлүүлэх, үүнтэй холбоотой зардлыг хувийн музейд нөхөн олгох болон музейн үзмэртэй шууд харилцах албан тушаалтанд найман жил тутам нэг жилийн үндсэн цалинтай тэнцэх хэмжээний мөнгөн урамшууллыг олгох тухай төслийн заалтыг 2022 оны нэгдүгээр сарын 1-ний өдрөөс эхлэн дагаж мөрдөх талаарх зарчмын зөрүүтэй саналыг Байнгын хорооны хуралдаанд оролцсон гишүүдийн олонх дэмжжээ.

Байнгын хорооны санал, дүгнэлттэй холбогдуулан УИХ-ын гишүүдээс асуулт, тодруулга гараагүй тул зарчмын зөрүүтэй саналын гурван томьёоллоор тус бүр санал хураалт явуулаад, төслүүдийг эцэслэн батлах бэлтгэл хангуулахаар Боловсрол, соёл, шинжлэх ухаан, спортын байнгын хороонд шилжүүлэв.