УИХ-ын чуулганаар Л.Оюун-Эрдэнийг Ерөнхий сайдад томилох асуудлыг хэлэцэж байна. УИХ-ын гишүүдийн нэр дэвшигчээс асууж буй асуултын олонхи нь Оюутолгойн гэрээг яах вэ? гэдэг асуулт.

Тухайлбал, Ж.Сүхбаатар гишүүн /Л.Оюун-Эрдэнийн Засгийн газарт эчнээ яригдаад эхэлсэн/ "Би Оюутолгойн гэрээг батлахад УИХ-ын гишүүн байсан. Гэхдээ 34 хувийнхаа хөрөнгө оруулалтыг төлж дууссанаас хойш Монголын тал зардал хуваалцахгүй гэж ойлгосны үндсэн дээр гэрээг дэмжсэн" хэмээн ярив. Нэг үгээр Монголын тал компанийн 34 хувийг эзэмших боловч нэг төгрөгийн санхүүжилт гаргахгүйгээр /жишээлбэл, далд уурхайн бүтээн байгуулалт дээр/ ноогдол ашиг хүртэх сонирхол манай УИХ-д байсан юм шиг байна. Гэвч тухайн хүн юу гэж ойлгох нэг хэрэг, гэрээнд юу заасан нь өөр хэрэг.

Хоёрдугаарт, Ж.Сүхбаатар гишүүний хувьд "Би гэрээг батлалцсан хүний нэг, тухайн үед дэмжиж байсан" гэж хэлж байгаа нь сайн хэрэг. Харин тэгж хэлэх ёстой бас нэгэн хүн огт дуугарахгүй байгаа нь тухайн үед УИХ-ын гишүүн, Зам тээвэр, барилга хот байгуулалтын сайдаар ажиллаж байсан, одоогийн Ерөнхийлөгч Х.Баттулга. УИХ-аар баталсан ХОГ "хулхи байжээ", монголчуудыг хуурчихжээ гэвэл хариуцлагыг Х.Баттулга ч гэсэн хамт үүрэх ёстой гол оролцогчдын нэг мөн. Ядаж л сул гишүүн байсан Ж.Сүхбаатараас илүү оролцоотой байсан, хариуцлага ч гэсэн тэр хэмжээгээр оногдох ёстой. 

Гэвч мань хүн Ерөнхийлөгчөөр сонгогдсон цагаасаа эхлэн уг гэрээг шүүмжилж, бүр гэрээг байгуулсан бүх хүнийг толгой дараалан шоронд хийсэн. Энэ нь цаагуураа Оюутолгойн гэрээг эсэргүүцэх нь Х.Баттулга гэдэг хувь хүний байр суурь биш, Монголын төрийн байр суурь юм аа гэж дэлхий дахинд зарлаж байгаа хэрэг л дээ. Гэвч тэгэх нь хэнд ашигтай вэ? 

Сүүлийн өдрүүдэд Монголын Засгийн газар болон Рио Тинтогийн хооронд үүссэн хурцадмал байдлын цаана Монголын Ерөнхийлөгч Х.Баттулгын ашиг сонирхол бий гэх мэдээллүүд ч гадаадын хэвлэлүүдээр гарч эхэлжээ. Тухайлбал, дэлхийд тэргүүлэх уул уурхайн аналитик хэвлэл mining.com-д "Монголын төрийн тэргүүн Рио Тинто болон Туркоиз Хилл Ресурс компанийн "Оюутолгой" төсөлд эзлэх байр суурийг унагахаар оролдсон байгаа" тухай нийтэлжээ. Хэрэв Дубайн гэрээ цуцлагдвал оронд нь Орос, эсвэл Хятадын хөрөнгө оруулагчдыг оруулж ирэх нь Х.Баттулгын ашиг сонирхол юм хэмээн бичсэн байна.

Товчхон хэлбэл, Ерөнхийлөгчийн бүрэн эрхийг хугацаа дуусах дөхөж байгаа. Түүнээс урьтаж Оюутолгойн төсөлд өөрийн эрх ашгийг шургуулах л сонирхол Х.Баттулгад байгаа юм биш биз?

Б.Жаргал