Төрийн байгуулалтын байнгын хорооны хуралдаан болж Л.Оюун-Эрдэнийг Монгол Улсын Ерөнхий сайдаар томилохыг олонхын саналаар дэмжлээ. 

Энэ үеэр Ерөнхий сайдад нэр дэвшигч Л.Оюун-Эрдэнэ "Монгол Улсын Үндсэн хуулийг бүх иргэн, төрийн байгууллага дагаж мөрдөх үүрэгтэй. Үүний хүрээнд Засгийн газар ажиллана. Үүргээ биелүүлнэ. Хууль тогтоох, гүйцэтгэх, шүүх эрх мэдэл бие биедээ хяналт тэнцвэртэй, хараат бус шүүхтэй байх ёстой. Энэ хяналт тэнцвэрийг барьж ажиллана. Хувь хүн биш хууль засагладаг засаг төртэй байх ёстой. Ийм итгэл үнэмшлээр ажиллана" гэлээ.

Гишүүд асуулт асууж, үг хэлсний дараа Байнгын хорооны дарга Л.Энх-Амгалан “Монгол Улсын 32 дахь Ерөнхий сайдыг томилох тухай” Улсын Их Хурлын тогтоолын төслийг танилцуулав.

Монгол Улсын Үндсэн хуулийн Хорин тавдугаар зүйлийн 1 дахь хэсгийн 6 дахь заалт, Гучин есдүгээр зүйлийн 2 дахь хэсэг, Монгол Улсын Засгийн газрын тухай хуулийн 21 дүгээр зүйлийн 21.4 дэх хэсэг, Монгол Улсын Их Хурлын чуулганы хуралдааны дэгийн тухай хуулийн 28 дугаар зүйлийн 28.3 дэх хэсэг, санал хураалтын дүнг үндэслэн Монгол Улсын Ерөнхий сайдаар Лувсаннамсрайн Оюун-Эрдэнийг томилж, энэхүү тогтоолыг баталсан өдрөөс нь эхлэн дагаж мөрдөхөөр төсөлд тусгажээ.

Үүгээр Төрийн байгуулалтын байнгын хорооны өнөөдрийн хуралдаан өндөрлөлөө.