У.Хүрэлсүхийн Засгийн газар огцорчихлоо. Дараачийнх нь Засгийн газар ч төвөггүй байгуулагдах юм шиг байна. МАН-ын дарга У.Хүрэлсүх өмнө нь өөрийнх нь танхимд ХЭГ-ын даргаар ажиллаж байсан нутгийн дүү Л.Оюун-Эрдэнийг 100 хувийн саналаар намын Бага хурлаас нэр дэвшүүлснээс үзвэл шинээр байгуулагдах Засгийн газарт У.Хүрэлсүхийн танхимаас цөөнгүй сайд улирч үлдэх бололтой. Харин У.Хүрэлсүх нь гурав, дөрөвхөн сарын дараа намын даргаасаа түдгэлзээд Ерөнхийлөгчид нэр дэвшээд ороод ирнэ. Хонь бүрэн, чоно цатгалан...

Гэвч У.Хүрэлсүх, Х.Баттулга нарын өөд өөдөөсөө ханцуйлсан хутга шөвөгний үзүүрт гэнэ сэрэггүй явсан нэг нөхөр "төөрсөн гөлөг шиг" өлгөгдөөд гараад ирсэн нь Ерөнхий сайд асан Сү.Батболд болов. Ерөнхийлөгч Х.Баттулга Ерөнхий сайд асан Сү.Батболдыг "Төрийн эргэлт хийлээ. Монголын төрийг хямрааж, ард түмний сонголтыг нухчин дарах ажлыг эхлүүллээ" хэмээн чуулганы индрээс мэдэгдэв. Харин У.Хүрэлсүх нь Х.Баттулгыгаа "ард түмнийг үймээн самуунд турхирсан, Үндсэн хуулийн дагуу хариуцлага хүлээлгэх ёстой" гэв. Магадгүй зөвхөн өөрсдөө л ойлгож чадах огт өөр хэлээр ярилцаж байгаа байх.  

Тухайлбал, Сү.Батболдын "төрийг хямрал руу түлхэх" болсон шалтгааныг Оюутолгойн гэрээтэй холбосон Ерөнхийлөгчийн үгэнд ямар нэг учир шалтгаан буюу "логик" байсангүй. Сануулахад Оюутолгойн гэрээг байгуулахад оролцсон Монгол Улсын Ерөнхий сайд, Сангийн сайд нар бүгд шүүхээс ял авсан. Харин Сү.Батболд бол уг гэрээтэй огт холбоогүй хүмүүсийн нэг.

Оны өмнөхөн түүний талаар дэгдээсэн "оффшорын" асуудал хуулийн хувьд дууссан учир түүнд холбогдуулах өөр хэрэг олдоогүй бололтой. Харин ч Сү.Батболдын талаар Нью Йоркийн шүүхэд хуурамч мэдээлэл гаргасан гаднын хуулийн фирмийн ард одоогийн Ерөнхийлөгч байжээ гэж дүгнэж болохоор байна. Мөн Нью Йоркийн Сү.Батболд дээр явуулсан ажиллагаагаа зогсоосны дараа дотооддоо буюу Баянзүрх дүүргийн шүүхэд хувь хүнээр гомдол гаргуулан хаалттай шалгуулж байгаа тухай Ерөнхий сайд асан анх удаа чуулганы индэр дээрээс ам нээжээ.

Болж өнгөрсөн үйл явдлыг "сонгуульд нэр дэвших магадлалтай" этгээдийн эсрэг улс төрийн хар технологи гэж үзэх хүн цөөнгүй байгаа ч өнөөдрийг хүртэл Сү.Батболд гэдэг хүн МАН-аас Ерөнхийлөгчид нэр дэвших боломжтой талаар нэг ч эх сурвалжийн мэдээлэл алга. Мань хүн өөрөө ч энэ талаар огт бодоогүй явсан бололтой юм. Тэгэхээр асуудал өөр зүйлд байна аа гэсэн үг.

Эх сурвалжийн хэлснээр Х.Баттулга, Сү.Батболд нарын хувьд өнгөрсөн цаг үед эрх ашиг нь огтлолцсон буюу зөрчилдсөн ганцхан зүйл байсан нь Сү.Батболд Ерөнхий сайд байх үедээ Тавантолгойн ордод хөрөнгө оруулах хамтарсан консерциумыг шалгаруулахад Х.Баттулгыг өөрийг нь оруулаагүйд одоо болтол өс санаж явдаг гэнэ. Гэхдээ тэр ч гэсэн цаг хугацаатай. Харин ийм дайны мөнгөн дүнтэй том төслийн төлөө бол У.Хүрэлсүх, Х.Баттулга хоёр өлхөн муудалцаж чадна. Эсвэл? 

Эсвэл зүгээр л энэ хоёр хүн өөр өөрийнхөө сурснаар тоглож, нэг нь сурсан зангаараа галын шугамнаас оргож, нөгөө нь оффшор, Оюутолгойн гэрээ гэх "салхин тээрэм"-тэй байлдаж байна.

Б.ЗАЯА