УИХ дахь Ардчилсан намын бүлэг Ерөнхий сайд У.Хүрэлсүхэд шаардлага хүргүүлэв. АН-ын бүлгээс УОК-ийн дарга Я.Содбаатар, нийслэлийн Онцгой комиссийн дарга /нийслэлийн Засаг дарга/ Д.Сумьяабазар, Эрүүл мэндийн сайд Т.Мөнхсайхан нарыг албан тушаалаас нь нэн даруй огцруулахыг шаардсан байна.

Тодруулбал, өнгөрсөн хугацаанд амь нас болон эрүүл мэнд, сэтгэл зүйн хохирол амссан Монгол Улсын иргэд УОК-ийн буруу шийдвэрээс болж хохирсон. Коронавируст халдварын үед авч хэрэгжүүлж байгаа арга хэмжээ оновчтой бус байгааг УИХ дахь Ардчилсан намын бүлэг удаа дараа сануулсаар ирсэн бөгөөд ямар ч үед хүний эрхийг дээдэлж ажиллах ёстой гэдэг байр сууриа илэрхийлсээр ирсэн билээ.

Гэвч өнгөрсөн жил гаруйн хугацаанд Монгол Улс цар тахалтай тэмцэх, урьдчилан сэргийлэх талаар ямар ч бэлтгэлгүй, цаасан дээр хэдэн хууль, журам батлахаас хэтэрсэнгүй. Халдварын тохиолдол илрэх бүрд УОК, түүний шийдвэрийн биелүүлэгч төрийн байгууллагын албан тушаалтнууд иргэдийг буруутгаж, нэр төрд халдсан, ялгаварлан гадуурхдаг ёс зүйгүй үйлдлүүд гаргасаар байна.

Үүний нэг жишээ нь дөнгөж төрсөн эмэгтэй нярай хоёрыг шилжүүлэн зөөвөрлөж байгаа явдал. Тиймээс энэхүү харгис үйлдлүүдийнхээ хариуцлагыг хүлээх цаг нь одоо болсон хэмээн АН-ын бүлгээс мэдэгджээ.

Мөн иргэд ч энэ байдлыг тэвчихгүй хэмээн Сүхбаатарын талбайд цуглаж эсэргүүцлээ илэхийлсээр байна.