УИХ-ын гишүүн Б.Пүрэвдорж санаачлан Малчид, хувиараа эрхлэгчдийн тэтгэврийн даатгалын шимтгэлийг нөхөн төлүүлэх тухай хуулийн төсөл санаачилж, УИХ-д өргөн барьсныг өнөөдөр Төсвийн байнгын хороогоор хэлэлцэн дэмжлээ.
УИХ-өөр өмнө баталсан Тэтгэврийн даатгалын шимтгэлийг нөхөн төлөх хуулийн хугацаа 2020 оны арванхоёрдугаар сарын 31-ний өдрөөр дуусгавар болсон бөгөөд Нийгмийн даатгалын байгууллагаас гаргасан мэдээгээр энэ хугацаанд даатгалын шимтгэлээ нөхөн төлөх ёстой иргэдийн 33 хувь буюу 9.2 мянган малчин, хувиараа хөдөлмөр эрхлэгч хамрагдаж, 17.7 тэрбум төгрөгийн шимтгэлийг нөхөн төлсөн байна. Эдгээр иргэдийн 6,5 мянга нь шинээр тэтгэвэр тогтоолгосон иргэд байжээ.
Үлдсэн 60 гаруй хувь нь цар тахал гарч, улс орны хэмжээнд хөл хорио тогтоосны улмаас хуулийн үйлчлэлд хамрагдаж чадаагүй тул гишүүн Б.Пүрэвдорж санаачлан дээрх хуулийн төслийг өргөн барьжээ.
УИХ хуулийн төслийг яаралтай горимоор хэлэлцэж эхэлсэн багөөд хууль батлагдсан тохиолдолд 2021 оны нэгдүгээр сарын 01-ний өдрөөс мөрдөж эхлэх юм.
Мөн шимтгэлийн хувь хэмжээнд өөрчлөлт орохгүй бөгөөд Хөдөлмөр, нийгмийн зөвшлийн гурван талт Үндэсний хорооноос 2020 онд мөрдүүлэхээр баталсан хөдөлмөрийн хөлсний доод хэмжээний 10 хувь буюу 42,000 /дөчин хоёр мянга/ төгрөгийг хэвээр үлдээх нь зүйтэй гэж үзсэн байна.
Харин хууль санаачлагчийн оруулж ирсэн шимтгэлийг нөхөн төлөх хугацааг хоёр жилээр /2022 дуустал/ тавих саналыг Байнгын хороо өөрчилж, 2021 оны дуустал буюу нэг жилийн хугацаатай байхаар дэмжсэн байна.
