Өнөөдөр Улсын дээд шүүх Ерөнхий сайд асан Ж.Эрдэнэбатад холбогдох эрүүгийн хэргийг хяналтын журмаар хэлэлцэж, анхан шатны шүүхийн шийдвэрийг хэвээр үлдээсэн Нийслэлийн давж заалдах шатны шүүхийн тогтоолыг хүчингй болгожээ. Хэргийг дахин шалгуулахаар прокурорт буцаасан байна.

Өнгөрөгч 2020 оны УИХ-ын сонгуулийн сурталчилгааны үеэр Ерөнхий сайд асан Ж.Эрдэнэбатыг албан тушаалын хэргээр эрүү үүсгэн яллагдагчаар татаж, цагдан хорьсон билээ. Ингэснээр Ж.Эрдэнэбат нь УИХ-ын гишүүний бүрэн эрхтэйгээ цагдан хоригдсон ч УИХ-ын 26-р тойргийн /Сэлэнгэ аймаг/ сонгогчид түүнийг УИХ-д улираан сонгосон байдаг.

Гэвч сонгуулийн дараа буюу өнгөрөгч долдугаар сард Сүхбаатар дүүргийн Эрүүгийн хэргийн анхан шатны шүүхээс түүнийг "Улс төрд нөлөө бүхий этгээд өөртөө болон бусдад давуу байдал бий болгож, эрх мэдэл, албан тушаалын байдлаа ашиглах гэмт хэргийг зохион байгуулсан" гэм буруутайд тооцож, нийтийн албанд ажиллах эрхийг таван жилээр хасч, зургаан жил хорих ял оногдуулсан юм.

Ж.Эрдэнэбат анхан шатны шүүхийн шийдвэрийг эсэргүүцэн давж заалдсан боловч өнгөрөгч есдүгээр сард хуралдсан Нийслэлийн давж заалдах шатны шүүхээс анхан шатны шүүхийн шийдвэрийг хэвээр үлдээсэн билээ. 

Уг хэргийг өнөөдөр УДШ-ийн эрүүгийн танхимаар хэлэлцэж, анхан шатны шүүхийн шийдвэрийг хэвээр үлдээсэн давж заалдах шатны шүүхийн тогтоолыг хүчингүй болгож, хэргийг прокурорт буцаасан байна. 

Нэгэнт түүнд ял оногдүүлсан шүүхийн тогтоол хүчингүй болсон тул Ж.Эрдэнэбатын УИХ-ын гишүүний бүрэн эрх сэргэж, тангаргаа өргөнө. Харин хэргийг шалгах явцад прокурорын байгууллага түүнд таслах сэргийлэх арга хэмжээ авах шаардлага гарвал УИХ-аас зөвшөөрөл авах буюу бүрэн эрхийг түдгэлзүүлэх хэрэгтэй болох нь.