Улсын Их Хурлын Нийгмийн бодлогын байнгын хорооны өнөөдрийн /2021.01.06/ хуралдаанаар Засгийн газраас 2018.03.26-ны өдөр өргөн мэдүүлсэн Хөдөлмөрийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн анхны хэлэлцүүлгийг явуулж байна.

Тус хуулийн төслүүдийг хэлэлцэх эсэх асуудлыг Байнгын хорооны дөрөвүгээр сарын 10-ны өдрийн хуралдаанаар хэлэлцээд хэлэлцэхийг дэмжсэн бол чуулганы нэгдсэн хуралдаанаар 2018 оны 4 дүгээр сарын 13-ны өдөр хэлэлцэж, хэлэлцэхийг дэмжсэн юм. Хөдөлмөрийн тухай хууль 1999 онд шинэчлэгдэн батлагдсанаас хойш 24 удаа нэмэлт, өөрчлөлт оруулсан байдаг ч шинэчилсэн найруулгаар батлагдаж байгаагүйг хуралдааны эхэнд Байнгын хорооны дарга М.Оюунчимэг онцолж, одоо мөрдөж буй хуульд байхгүй цоо шинэ зохицуулалтуудыг шинэчилсэн найруулгад тусгасныг тэмдэглэв.

Энэ удаагийн шинэчилсэн найруулгын төсөлд сул зогсолтуудын талаар болон ажилтан зайнаас ажиллах, гэрээсээ болон сонгосон байршилд ажиллах, ажлын бүтэн бус цагаар ажиллах гэсэн гэрээний асуудал, мөн иргэд хоорондоо хөдөлмөрийн гэрээ байгуулах зэрэг онцлог зохицуулалтуудыг тусгасан юм байна.

Гишүүд хуулийн төслийн зүйл бүрээр асуулт асууж, хариулт авахын зэрэгцээ Ажлын хэсгийн бэлтгэсэн саналын томъёоллоор санал хураалт явуулж байна. Байнгын хорооны хуралдаан үргэлжилж байна.