Ерөнхийлөгч Х.Баттулга “Камекс” ХХК компанийг Монгол Улсад үүсгэн байгуулж, охин компаниуд нь нүүрс, алт, зэсийн 17 лиценз авсан аж. Түүний нэг нь стратегийн ордын хоёрдугаар жагсаалтад байгаа Төгрөг нуурын нүүрсний орд юм. Бусад нь Говь-Алтай, Завхан, Дундговь аймгийн нутаг дэвсгэрт байдаг алт, зэс, нүүрсний лиценз бөгөөд нийт 75.000 га газар нутгийг хамарсан, 17 лиценз байгааг өдөр тутмын сонинуудын “ЭРЭН СУРВАЛЖЛАГЧ” нэгдлээс  ил болголоо.

Тэгвэл Төгрөг нуурын ордыг 2010 онд Х.Баттулга 250 сая ам.доллароор оффшор бүсэд бүртгэлтэй хятад эзэнтэй Мин Шин Уотервокс Лимитед Кайманы арлын оффшор бүсэд бүртгэлтэй (Ming Нing Waterworks Limitedincorporated in Cayman islands) компанид зарсан гэх мэдээ нь одоо ч гэсэн Хонгконгийн хөрөнгийн биржийн веб хуудсанд ил байна.

“Камекс” ХХК-ийн 90 хувийг Х.Баттулга өөрөө эзэмшиж, Ядамсүрэнгийн Батсүх буюу “Ард Батсүх” 10 хувийг эзэмшиж байсан аж. Х.Баттулга өөрийн нэр дээр байсан 90 хувийг 2007 оны гуравдугаар сарын 21-ний өдөр охин Б.Намуундаа шилжүүлж, тун удалгүй 2007 оны дөрөвдүгээр сарын 4-нд төрсөн эгч Халтмаагийн Цэндсүрэнд шилжүүлсэн тухай өдөр тутмын сонинуудын “ЭРЭН СУРВАЛЖЛАГЧ” нэгдлээс мэдээллэв.