УИХ-ын нэгдсэн чуулганаар "Коронавируст халдварын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төсөл"-ийг хэлэлцэж эхэллээ.
Энэ үеэр Шадар сайд Я.Содбаатар Ковид-19 халдварын нөхцөл байдлын талаар мэдээлэв.
Өнөөдрийн байдлаар улсын хэмжээнд нийт 1068 хүн коронавирусын халдвар авсны 392 нь зөөвөрлөгдөн орж ирсэн байна.
УИХ-ын гишүүн Ц.Даваасүрэн "Зарим үр дүнгүй арга хэмжээгээ болиод явсан дээр. Хамгийн гол арга хэмжээгээ авчихлаа. Цахилгаан, дулааны хөнгөлөлтийг айл өрхүүддээ үзүүлэх нь маш том зүйл. Онцгой дэглэмд ажиллаж байгаа хүмүүстээ ПСР шинжилгээ хийх хэрэгтэй. Улаанбаатараа хаачихаад дотроо бизнесээ явуул л даа. Содбаатар сайд аа, ухаалаг байх хэрэгтэй шүү. Тусгаарлалтад байгаа хүмүүсийнхээ хүний эрхийн асуудлыг анхаарах хэрэгтэй. Тусгаарлалтад 2-3 сар болчихсон жирэмсэн хүмүүс байна, одоо тэндээ төр гэж байна. Хоёр сар болоод гарч байгаа оюутнууд байна" гэлээ.
Харин Шадар сайд Я.Содбаатар "Би хаагаад байгаа зүйл биш л дээ. ДЭМБ болон мэргэжлийн эрдэмтэн судлаачид нь халдвар дэлгэрнэ, жилийн эцэс болоход шинээр халдвар авсан хүний тоо 400-450 хүн болох нь, цагаан сар болоход 2,800 хүн болох нь гээд зөвлөсөн. Тиймээс дэлхий нийтийн жишгээр хөл хорионы арга хэмжээ авч байгаа. Анхны тохиолдол гарч байх үед халдвар хамгааллын дэглэм барихгүй бол нэг хүнээс найман хүнд халдварлах чадвартай гэж үзэж байсан. Харин хөл хорионы дэглэм барих үед нэгээс нэг хүнд болж буурсан. Сүүлийн голомт тогтоогдсон хугацаанд нэг хүний халдварлах чадвар 1.5 хувьд хүрч байна. Үүнийг нэг хувьд буулгаж байж хөл хорионы дэглэмийг бууруулна гэдэг маш нарийн судалгааг мэргэжлийн хүмүүс гаргаж өгч байгаа" гэлээ.
