Засгийн газраас боловсруулаад буй Эрүүгийн хуульд нэмэлт, өөрчлөлт оруулах хуулийн төсөлд мэдэх, хэвлэн нийтлэх эрхийг ноцтой зөрчсөн заалт оруулсныг мэргэжлийн байгууллагууд эсэргүүцэж буйгаа илэрхийлж байгаа билээ. 

Тодруулбал, ХЗДХЯ-наас боловсруулсан уг хуулийн төслийн Худал мэдээлэл тараах, түгээхтэй холбоотой бүлэгт зааснаар хэвлэн нийтлэхээс гадна олон нийтийн сүлжээнд хувь хүн үзэл бодол, байр суурийг түгээсэн тохиолдолд ч эрүүгийн хариуцлага хүлээлгэх болоод байгаа юм. 

Хуулийн төслийн уг заалттай холбоотойгоор ХЗДХ-ийн сайд Х.Нямбаатар өчигдөр NTV телевизийн “Улаан бал” ярилцлагын нэвтрүүлэгт оролцсон юм.

Тэрээр ярилцлагын үеэрээ Монгол улсын Ерөнхийлөгч асан Ц.Элбэгдоржийн талаар дурьдсан юм. 

Харин Ц.Элбэгдорж сайд Х.Нямбаатарт хандан хэдэн зөвөлгөө өгчээ. 

Тэрээр өөрийн цахим хуудаснаа "Миний нэр "Улаан бал"-аар бас л гарсан сурагтай. Хэвлэл, вэб, сошиал гээд шүүр шанага болтлоо шүршүүлдэг хүн л дээ би. Хамгийн их муулуулдаг хүнийг олоод ир гэвэл эхнийх нь би болох байх. Энд нэг учир бий. Ардчилсан хувьсгалаас иргэдэд бодитой наалдсан, эдэлж байгаа бараг цор ганц эрх бол иргэдийн үзэл бодлоо чөлөөтэй илэрхийлэх эрх, эрх чөлөө юм.

Бусад эрхийг нь төр булаасан, хутгалдаж орсон, эдлэх боломж олгохгүй байгаа гээд түмэн юм бий. Тиймээс ганц ч болов үлдсэн, бодитой эдлэж байгаа эрхээр нь оролдоод яахав, би тэвчихгүй бол, чи ойлгохгүй бол бусад нь яах юм гээд л өнгөрөөгөөд байгаа юм.

Хүний үзэл бодлоо илэрхийлэх, хэвлэлийн эрх чөлөө бол бусад эрхийн эх учраас хамаагүй эхэлж оролдож болдоггүй юм. Бусад улс орны жишээ энд наалдацтай биш. Тэр орнуудад иргэнийхээ маш олон эрхийг хуулиар баталгаатай эдлүүдэг юм. Манайд Иргэний улс төрийн эрхийг хэрэгжүүлэх, Иргэний мэдэх эрхийг хангах гээд.. алхам ч хийгдээгүй байна. Тэвчих л хэрэгтэй.

Нөгөө талаар бол улс төр бол хүнд ажил. Зодуурын хүүдий гэсэн үг. Ийм замыг ухамсартай сонгож, ял ямбыг нь эдлэж яваа атлаа намайг зодлоо, цохилоо гээд байх нь утгагүй. Зарим нэг ажлыг хийхгүй, зарим нэг юмаар оролдохгүй, зарим нэг юманд хариулахгүй байх л хамгийн том эрх юм билээ" гэжээ.