УИХ-ын гишүүн Б.Пүрэвдорж Нийгмийн даатгалын сангаас олгох тэтгэвэр, тэтгэмжийн тухай хуульд өөрчлөлт оруулах төсөл санаачилжээ.

Энэ талаар Б.Пүрэвдорж гишүүн өнөөдөр мэдээлэл хийлээ. 

Тэрээр "Одоо хүчин төгөлдөр үйлчилж буй Нийгмийн даатгалын сангаас олгох тэтгэвэр, тэтгэмжийн тухай хуулиар өндөр насны тэтгэврийн хэмжээг сүүлийн долоон жилийн дундаж цалингаар тогтоож байгаа. Үүнийг буцааж таван жил болгон бууруулахаар төсөл санаачиллаа. Энэ нь тэтгэврээ арай илүү өндөр авах боломжийг бүрдүүлж байгаа юм. 

Бидний гаргасан тооцооллоор шинээр тогтоолгох тэтгэврийн хэмжээ доод тал нь 100 мянган төгрөгөөр нэмэгдэх нөхцөл бүрдэнэ гэж үзэж байгаа.

Эрх баригч нам шударгаар нийгмийн даатгалаа төлж байгаа иргэд өөрийн хуримтлуулсан мөнгөө эргүүлж авах боломжийг бүрдүүлэх байхаа гэж бодож байна" гэлээ.

Тэрээр өмнө нь Малчид, хувиараа хөдөлмөр эрхлэгчдийн нийгмийн даатгалаа нөхөн төлөх хугацааг нэг жилээр сунгах хуулийн төслөө өргөн бариад буй. Түүнчлэн энэ мэт иргэдийн аж амьдралд бодит хэмнэлт гарахуйц 10 хуулийн төсөл санаачилж, өргөн барина гэдгээ мэдэгдээд байгаа билээ.