Хууль зүйн сайд Х.Нямбаатар өөрийнхөө санаачилж батлуулсан Эрүүгийн хуулийн заалтаар иргэдээ намнаж эхэллээ. Эхний хохирогч нь жүжигчин Б.Навчаа болов.

Өнөөдөр жүжигчин Б.Навчаа өөрийн цахим хуудаснаа Хууль зүй, Дотоод хэргийн сайд Х.Нямбаатарын гомдлоор шүүхэд дуудагдсан яллах дүгнэлтээ олон нийтэд харууллаа. Тэрээр өөрийн цахим хуудаснаа сайд Х.Нямбаатарын санаачилсан хуулийн шүүмжлэн бичсэн аж.

Жүжигчин Б.Навчаа бичихдээ “Х.Нямбаатар сайдын санаачилсан хуулийг эсэргүүцэж байна. Яаж тэнэгтэхээрээ 14-16 насны охидод бэлгийн дарамт үзүүлсэн бол харилцан бэлгийн харьцаанд орсон гэж торгох хууль баталж байгаа юм бэ. Энэ хууль насанд хүрээгүй охидыг хүчирхийлж болно гэсэн утга агууламжтай санагдлаа” гэсэн утга бүхий пост оруулжээ.

Энэ сайдын маань эгдүүцлийг их хүргэсэн бололтой. Сайд түүний постыг нэр хүндэд халдаж илтэд худал мэдээлэл гаргасан хэмээн цагдаагийн байгууллагад гомдол гаргасан нь хэрэг үүсч прокурорын газраас ЯЛЛАХ ДҮГНЭЛТ үйлджээ.

Жүжигчин Б.Навчаад Эрүүгийн хуулийн 13-ийн 14 дэх хэсэгт зааснаар гүтгэх заалтаар гомдол гаргасан байна. Мэдээж хуулийн дагуу жүжигчин Б.Навчаад холбогдох шүүх хурлын тов гарна.

Харин жүжигчин Б.Навчаа өнөөдөр өөрийн цахим хуудаснаа “Ийм пост бичээд ял авахаар болж байна даа. Гомдомтгой Нямбаатар сайдыгаа та нар минь дандаа хайрласан хүндэтгэсэн пост оруулахгүй бол Гомдоод өширхөөд шүд зуугаад шүүхэд өгөөд байна шүү анхаар манайхаан!!!! Үзэл бодлоо илэрхийлэх эрхгүй болсон шүү. Уг нь хуулийг хөнгөдсөн байна гэж бичсэн болохоос Нямбаатарын нэр хүндэд халдсан зүйл огт байхгүй юмсан. Цагдаа прокурор нь сайдынхаа талд бат зогсож таньдаа хайртай шүү л гэж байна. Шүүх нь сайддаа хайртай үгүйг харъя даа” гэжээ.