Өнөөдөр улс тунхагласны баярын өдөр... Ийм үг, утга агуулгатай мэндчилгээг бие биедээ илгээсээр он удаан жил өнгөрч. Бүр социализмын үеэс уламжилж ирсэн. Төрийн албан ёсны мэндчилгээнд хүртэл энэ хэвээрээ явж байгаа. Хэн яагаад залруулахгүй өдий хүрсэн нь ч гэсэн сонин.

Уг нь монголчууд тусгаар улсаа байгуулсан нь 1911 оны цагаагчин гахай жилийн өвлийн дунд сарын шинийн есөн буюу аргын тооллын 1911 оны 12 сарын 29. Энэ өдөр монголчууд 200 гаруй жил үргэлжилсэн Манж Чин гүрний ноёрхлыг эцэс болгон үндэсний тусгаар тогтнолоо зарлаж, VIII Богдыг Монгол улсын шашин төрийг хослон баригч, хэмжээгүй эрхт хаанд өргөмжилсөн. Энэ өдөр төрийн тамга, төрийн далбаа, өргөмжлөл, хүндэтгэлийг өргөж, таван яам бүхий Засгийн газрыг байгуулан, тусгаар тогтносон Богд хаант Монгол улсыг байгуулсан юм. 

Харин 1924 оны 11 дүгээр сарын 26-ны өдөр Монгол улс анхдугаар Үндсэн хуулиа баталж, Хаант засгаас Бүгд найрамдах засаглалд шилжин хамжлагат ёсыг халж, үндэсний хуульт шинэ засаглалыг байгуулсан билээ. Тиймээс энэ хоёр түүхэн үйл явдлыг хооронд хольж хутгалгүй, ялгаж салган нэрлэж, тэмдэглэж сурах цаг хэдийн болсон байлтай.

Энэ тухай хуульч Х.Тэмүүжин өөрийн фэйсбүүк хуудсанд,

"Өнөөдөр тусгаар улс тунхагласан баярын өдөр биш шүү! Олон хүн андуурч бичсэн байна.

Өнөөдөр бол: Туурга тусгаарлаж улс болчихсон Монголчууд хаант засаглалаас Бүгд найрамдах засаглалд шилжиж Иргэний улсаа эмхлэн байгуулсан баярын өдөр.

Анхдугаар Үндсэн хуулиа баталж, эзний бус иргэний улс бүтээж бүрэн эрхт иргэд нь улс гэрээ засаглах болсон баярт өдөр!" хэмээн бичжээ.