Засгийн газар өнөөдөр ээлжит бусаар хуралдаж, гаргасан шийдвэрүүдээ танилцууллаа. 

Энэ үеэр цагдаагийн байгууллагаас Энхсаран сувилалыг шалгаж явцын талаар Хууль зүйн сайд Х.Нямбаатар мэдээлэв.

Тэрээр "Энхсаран сувиллыг хуулийн дагуу шалгаж байгаа. Прокурор руу өнөөдөр Энхсаран сувиллын хэрэг бүртгэл нээх хүсэлтээ явуулсан. Нийт хувийн, ЭМЯ-ны, Онцгой байдлын газрын 10 гаруй хүн энэ хэрэгт холбогдсон байгаа. Хэрэг бүртгэлийн хуудас, код нээгдмэгц эдгээр иргэдийг нэг бүрчлэн дуудаж байцаана. Энэ сувилал дээр гаднаас хүнс оруулсан, хоорондоо нийлж лайв хийсэн, нийтийн халууэ устай байсан зэрэг олон зүйлс ил болж байгаа. Яг хуульд заасан журмын дагуу шалгана.

Намайг Энхсаран сувилалтай холбоод байна. Надад сувилал байтугай түрээсийн нэг өрөө байр ч байхгүй.

Бүх нийтийн хөл хорио тогтоосон энэ үед нэгнийгээ гүжирдэх биш үнэн бодит мэдээллийг түгээгээсэй гэж хэвлэл мэдээллээс хүсэж байна.

Цагдаа маш их ачаалалтай ажиллаж байна. Сэлэнгэ аймагт цагдаа хавьталд орсон байж болзошгүй хэмээн хүрээ тогтоож, тусгаарласан. Иймд үлдсэн цагдаа нар 3 ээлжээр ажиллаж байна. СХД-ийн нэг иргэнийг мөн надтай холбосон мэдээллийг сэтгүүлчид тарааж байна. Бүх нийтийн бэлэн байдлын энэ өдрүүдэд хэвлэл мэдээллийн хэрэгслүүд үнэн бодит мэдээлэл хүргэх үүрэгтэй.

Төмөр замын халдварын голомтыг тогтоох ажил дээр Цагдаагийн байгууллага ажиллаж байна. Сэлэнгийн тодорхой алба хаагч нар халдвар авсан байх эрсдэлтэй. Улаанбаатарт нийт 6300 алба хаагч гурван ээлжээр дэглэм сахиулан ажиллаж байна" гэлээ.

Мөн тэрээр үргэлжлүүлэн гэр бүлийн хүчирхийллийн талаар "Гэр бүлийн хүчирхийлэлтэй холбоотой дуудлага мэдээлэл 60 орчим хувиар буурч байгаа. Гэхдээ хаалттай хаалганы цаана энэ асуудал нуугдаж байхвий гэдэг дээр сэтгэл эмзэглэж байгаа. Цагдаагийн байгууллагаас хэд хэдэн сошил медиа ажлуудыг зохион байгуулж ажилласан. Мөн цагдаа болон Дотоодын цэргийн алба хаагчид бараг гудамж бүрийн буланд ажиллаж байна. Эцэст нь нэг зүйлийг хэлэхэд, Иргэн бүр өөрсдөө гэмт хэрэг зөрчлийн талаар мэдээллийг холбогдох байгууллагад өгөх үүрэгтэй. Энэ үүргээ биелүүлж  хөршийнд нь асуудал үүсэж байвал цагдаагийн байгууллагад мэдээллэх хэрэгтэй. Энэ бол гэмт хэргийг таслан сэргийлэх сайн арга" гэлээ.