УИХ-ын чуулганы хуралдаан цахимаар үргэлжилж байна. Чуулганаар Цар тахлаас урьдчилан сэргийлэх, хамгаалах чиглэлээр засгийн газраас авч хэрэгжүүлж байгаа ажлын явц, үр дүн, цаашид авч хэрэгжүүлэх арга хэмжээний талаар хэлэлцэж байна. 

Гишүүд асуулт асууж, хариулт авч байна.

УИХ-ын гишүүн Г.Дамдинням "Шадар сайдаас асууя. Хөл хорио тогтоож ажиллаж байгаа тусгай чиг үүргийн байгууллагын алба хаагчдын эрүүл мэндэд хэрхэн анхаарч байна вэ. Энхийг сахиулах ажиллагаанд оролцуулдаг шиг ээлжтэй байлгах боломж бий юу? Тусгай эмчилгээ шаардлагатай, тухайлбал бөөрний аппаратад ордог хүмүүсийн эмчилгээг хэрхэн зохицуулж байна вэ?

Дараагийн асуулт банкууд хэзээ нээж гүйлгээ хийх вэ? Эдийн засгийн үйл ажиллагааг ингэж царцааж, зогсоож болохгүй. Хүү нь тахлын үед яваад байж, гүйлгээ хийх хэсэг нь байхгүй байна. Тодорхой хариулт хэлээ?

Эцэст нь Хууль зүйн сайдад хэлэхэд зам дээр байгаа хууль, хүчний байгууллагынханд баярлаж байгаа. Гэхдээ өчигдөр Их хурлын гишүүн хүн, ордон дээр цуглах ажилтай гээд явж байхад намайг зам дээр 30 минут зогсоосон. Харилцаа, контакт гээд эрүүл ахуйн аюулгүй байдал хангагдсан юм алга. Өгч байгаа үүрэг, даалгавар чинь газар дээрээ хэрэгжихгүй байна" гэлээ.  

УОК-ын дарга Я.Содбаатар "Цар тахлын голомтод ажиллаж байгаа салбар салбарын 12 мянга гаруй хүн байна. Эдгээр хүмүүсийг тодорхой ээлжинд оруулж ажиллаж байгаа. Жишээ нь, цагдаагийн байгууллагаас Улаанбаатар хотод нэг ээлжинд 3,800 орчим хүн ажиллаж байгаа. Энэ хүмүүсийг 10 гаруй тэрбум төгрөг гаргаж, хөдөлмөрийн хөлсний доод хэмжээгээр урамшуулсан" гэлээ. 

ХЗДХ-ийн сайд Х.Нямбаатар "Гамшгаас хамгаалах хуульд заасны дагуу Бүх нийтийн бэлэн байдлын зэрэгт шилжсэн хугацаанд 11 байгууллагын ажилтнуудыг гэр, ажлынхаа хооронд явахыг зөвшөөрсөн. Энэ үүрэг даалгаврыг хэрэгжүүлэхээр улсын хэмжээнд 6,343 цагдаа, дотоодын цэргийн алба хаагч ажиллаж байна. 

Хувийн ажлаар зорчиж яваа иргэдийн замын хөдөлгөөнд оролцуулна, оролцуулахгүй гэдэг асуудал маргаан дагуулж байгаа. Бүх иргэдийг цагдаа шалгаж дээр дурдсан 11 байгууллагад хамаарах хүмүүст зорчих эрхийг нь нээж өгч байгаа.

Өчигдөр УИХ-ын түр хорооны хуралдаанд зарим гишүүн оролцох шаардлагатай болсон тул, гишүүний үнэмлэхийг нь үндэслэж, Төрийн ордны чиглэлд явах эрхийг нээж өгөх чиглэлийг цагдаагийн алба хаагчдад өгсөн. Таньтай холбоотой харилцааны зөрчил, дутагдаж гаргасан цагдаагийн алба хаагчийг хувийн дугаараар нь мэдээлж болно. Эргэж хариу өгөх болно" гэлээ.

Эрүүл мэндийн сайд Т.Мөнхсайхан "Эрүүл мэндийн салбарт Сэлэнгэ аймгаас бусад газрын эмнэлгийн үйлчилгээ хэвийн явагдаж байгаа. Улсын хэмжээнд бөөрний диализийн аппаратад ордог хүмүүсийг оруулахгүй, эсвэл үйл ажиллагааг нь зогсоосон гэдэг зүйл байхгүй байгаа" гэлээ. 

Монголбанкны ерөнхийлөгч Б.Лхагвасүрэн "Банкны үйл ажиллагаа хэвийн явагдаж байгаа. Хорио цээрийн үед цахимаар яювагдаж байгаа. Их, бага гүйлгээ, картын гүйлгээ хэвийн явж байна. Иргэд пос машин, АТМ машин бүгд ажиллаж байгаа. Өдөрт дунджаар АТМ-ээс 27 мянга гаруй иргэн бэлэн мөнгө авч байна. Гүйлгээ саатсан асуудал байхгүй. Банкууд нээж ажиллах тал дээр УОК-оос зөвшөөрөл хүлээж байгаа. Банкуудын хувьд тодорхой хэсэгт халдвар хамгааллын дэглэмийн дагуу ажиллахад бэлэн байгаа" гэлээ.