УИХ дахь Ардчилсан намын бүлгийн гишүүд олон улсын санхүүгийн байгууллагуудтай уулзалт зохион байгуулж хамтарч ажилладаг билээ. Энэ хүрээнд Дэлхийн банкныхантай уулзалт хийлээ. Тус банкны Монгол дахь суурин төлөөлөгч Андрей Михнев, болон ахлах эдийн засагч Жийн-Паскаль Н.Нгану нартай Ардчилсан намын бүлгийн дарга Д.Ганбат, УИХ-ын дэд дарга С.Одонтуяа, УИХ-ын гишүүн Б.Пүрэвдорж, О.Цогтгэрэл нар уулзав. Уулзалт УИХ-аар 2021 оны төсөв, мөнгөний бодлогыг ид хэлэлцэж байгаа хариуцлагатай үед болсноороо онцлог байв.
Дэлхийн банкныхан Монгол Улсын эдийн засгийн өнөөгийн нөхцөл байдал, улсын төсвийн талаар өөрсдийн гаргасан саналаа танилцуулж, харилцан ярилцав. Дэлхийн банкны Монгол дахь суурин төлөөлөгч Андрей Михнев: “Монгол улсад уул уурхай эрчимтэй байна. Олон улсад ажлын байрыг шинээр бий болгох, иргэдэд бизнес эрхлэх боломжийг олгох замаар ядуурлыг шийддэг” гэж ярив. Дэлхийн банк Монгол улсын ядуурлын талаар 2017,2019 онуудад судалгаа хийжээ. УИХ-ын гишүүн Б.Пүрэвдорж “Манай улсад ядуурал төдийлөн буурахгүй байгаа нь Засгийн газраас авч хэрэгжүүлж байгаа арга хэмжээ төдийлэн оновчтой бус байгаатай холбоотой. Дэлхийн ямар ч улс бэлэн мөнгө тарааж ядуурлыг шийдэж байгаагүй” талаар саналаа хэлж байв. Мөн Ковид-19 цар тахалтай холбоотой их хэмжээний төсвийн зардал гарч төсвийн алдагдал ДНБ-ний 12 хувьд хүрсэн, Монгол Улсын гадаад өрийн хэмжээ бага дунд орлоготой дэлхийн улс орнуудын дунд өндөр байгаа асуудлыг гишүүд онцолж байсан юм.
Уулзалтын үеэр УИХ-ын дэд дарга С.Одонтуяа, Дэлхийн банк Монгол улсад байнга тусалж, олон төрлийн төсөл, хөтөлбөр хэрэгжүүлдэг, мөн цар тахлын хүнд үед санхүүгийн өгөөмөр дэмжлэг үзүүлсэнд Монголын ард түмнийг төлөөлөн талархаж буйгаа илэрхийлсэн юм.
Сэтгэгдэл (1)