Ерөнхийлөгч асан Ц.Элбэгдорж Ардчилсан намын гишүүнчлэлээ өнөөдөр сэргээлээ. Тэрээр намын дүрмийн дагуу ерөнхийлөгч болоод гишүүнчлэлээсээ түдгэлзээд байсан юм.

Өнөөдөр тэрээр өөрийн хүсэлтээр Ардчилсан намын гишүүнчлэлээ сэргээж байна гэдгийг Сүхбаатар дүүргийн Ардчилсан намын хороо мэдээлэв. Учир нь ерөнхийлөгч асан Ц.Элбэгдорж анх АН-ын гишүүн болохдоо тус хорооноос элсэж байжээ.

Энэ үеэр Ц.Элбэгдорж сэтгүүлчдийн асуултад хариулав. 

-АН-ыг үзэл санааны уналтад орсон гэдэг дүгнэлт улстөрийн хүрээнд яригдаж байгаа. Энэ уналтын үед та намын гишүүнчлэлээ сэргээж байгаа зорилго юу вэ? Намын шинэчлэлд таны оролцоо байх уу? 

-Ардчилсан нам хувь хүний эрх, эрх чөлөөг дээдэлдэг, баялаг бүтээгчдийг дэмждэг, монгол улсад хүнд суртал бага байх ёстой гэдэг чиглэлд явдаг үнэт зүйлтэй нам. Энэ үнэт зүйлээ сэргээж, үүсэж бий болсон тэр гүүрэн дээрээ бат зогсох ёстой гэж бодож байгаа. Тэгээд намын гишүүнчлэлээ сэргээж байна. 

-Та улстөрийн сонгуульд оролцох уу? 

-Энгийн иргэн, гишүүн байгаа нь хамгийн сайхан. Монгол улс иргэн байх нь өөрөө хамгийн өндөр албан тушаал гэж ойлгож байгаа. 

-Ардчилсан намд таны үүрэг оролцоо ямар байх вэ?

-Гишүүний хувьд намын үйл ажиллагаанд оролцох бодолтой байна. 

-Х.Баттулга ерөнхийлөгч сонгуульд өрсөлдвөл та мөн сөрж өрсөлдөнө гэж байсан. Та Ерөнхийлөгчийн сонгуульд өрсөлдөх үү?

-Гишүүний хувьд ажиллана. Би эх орондоо тангараг өрнөсөн хүн, эх орон дуудвал бид босч очих үүрэгтэй. Одоо бол жирийн иргэний журмаар нам, улс орны ажилд идэвхтэй оролцоод явна.