А.Адъяасүрэн нь УИХ-ын гишүүн болохоос өмнө нүүрс тээврийн С зөвшөөрөл авахын тулд Авто тээврийн газрын нэр бүхий албан тушаалтанд 100 мянган ам долларын авлига өгсөн хэргээр АТГ-т шалгагдаж, сэжигтнээр татагджээ. Улмаар хэргийн мөрдөн шалгах ажиллагаа дуусч, харьяаллын дагуу Нийслэлийн прокурорын газарт хэргийг шилжүүлсэн байна.
Тэгвэл энэ асуудлаар Улсын прокурорын Ерөнхий газраас аравдугаар сарын 07-нд мэдээлэл хийхдээ УИХ-ын гишүүн А.Адъяасүрэнд холбогдох хэргийг шалгаж байгаа гэж Нийслэлийн прокурорын газрын ерөнхий прокурорын орлогч Ц.Насанбат мэдээлсэн.
Харин УИХ-ын гишүүн А.Адъяасүрэн "Миний хувьд хувийн байгууллагад ажиллаж байсан. Төрийн байгууллагын хүмүүсийн эрх мэдлийн төлөөх тэмцэл, ашиг сонирхол үргэлжилж байна гэж би харж байгаа. Сонгууль дууссан юм чин удахгүй үнэн тогтоогдох байх. Намайг шалгаагүй, надад яллагдагчаар татсан тогтоол ирээгүй" гэлээ.
