УИХ-ын чуулганы өнөөдрийн хуралдаанаар Үндсэн хуулийн цэцийн 2020 оны Долдугаар сард гарсан дүгнэлтийг хэлэлцлээ. Хэлэлцэж байгаа асуудалтай холбогдуулан гишүүд асуулт асууж, хариулт авав.
Энэ үеэр УИХ-ын гишүүн Н.Алтанхуяг чуулганы ирц хангалтгүй мөн өнөөдрийн чуулганы эхэнд танилцуулсан Үндсэн хуулийн цэцийн дүгнэлттэй холбоотой асуулт асуух эрхийг нь хассан хэмээн нэлээд бухимдалтай байгаагаа илэрхийллээ.
Тэрээр “С.Бямбацогтын тайлбарыг сонсохгүй шүү. ҮХЦ-ийн дүгнэлттэй холбоотой асуулт асуух гэтэл хариулах хүн байхгүй гээд нэрийг минь хаслаа. Яагаад УИХ-ын гишүүний үг хэлэх эрхийг хааж байгаа юм. Орон нутагт томилолттой гээд байгаа гишүүд чинь орон нутгийн сонгууль дээр ажиллаж байна. УИХ-ын чуулгандаа суух ёстой биздээ. Яагаад УИХ-ын гишүүний үг хэлэх эрхэнд халдаж байгаа юм. Яагаад Занданшатар дарга, Бямбацогт дарга нар хууль зөрчиж байгаа юм. УИХ-ын гишүүд чинь орон нутгийн сонгууль гээд хөдөө орон нутагт солиорчихсон явж байна. Орон нутагт ямар алаан хядаан хийгээд, юу гээд яваад байгаа юм. Яахаараа ийм замбараагүй болчихсон юм. Би үгээ хэлмээр байна. Эхний асуудлыг та дахин хэлэлцүүлэх ёстой Занданшатар дарга аа. Та нар хууль дүрмийг ингэж уландаа гишгэж болохгүй ш дээ. Ингэхгүй юм бол бид энд суухын хэрэг юу байгаа юм. Тэр их хурлын гишүүдээ дуудаач. Хэрвээ Их хурлын гишүүд энд бөөндөө цуглахгүй юм бол би өнөөдөр сууж чадахгүй. 62 гишүүн сонгосон гээд байгаа. Та нар тэр 62 гишүүнээ цуглуул. Ийм шударга бус байж болохгүй. Цэцийн дүгнэлтийн талаар асуулт асуух, үг хэлэх ч эрхгүй амаа хумхиулаад сууж байж таарахгүй" гэлээ.
