УИХ дахь АН-ын бүлэг цаг үеийн асуудлаар мэдээлэл хийлээ. Шүүхээс Дархан-Уул аймгийн Ардчилсан намаас орон нутгийн сонгуульд нэр дэвшигчдийн бүртгэлийг хүчингүй болгожээ. 

УИХ-ын гишүүн, АН-ын бүлгийн дарга Д.Ганбат:

-Иргэдийн сонгох, сонгогдох эрх зөрчигдөж байна. Дархан-уул аймагт зөвхөн МАН өөрийн дагуул намтайгаа орон нутгийн сонгуульд оролцох нөхцөл бүрдлээ. АН-ын бүлгээс ард түмэндээ хандаж уриалж байна, сонгуульдаа идэвхитэй оролцоорой. Хэрэв тэгэхгүй бол сонгуулийг хэлбэр төдий явуулдаг, дагуул хэдэн нам ордог энэ байдал чинь явсаар урьд өмнө байсан нэг намын тогтолцоо руугаа эргэж орно. 

УИХ-ын дэд дарга С.Одонтуяа:

-Удахгүй орон нутгийн сонгууль болох гэж байна. Сонгуулиар улс төрийн намууд, бие даагч, санал хуваах намууд гээд нэр дэвшүүлж байна. Энэ явдал олон удаагийн сонгуулиар харагдаж байгаа.

Саяхан талбай дээр ХҮН жагсаал хийхдээ өөрсдийг нь сонгуульд оролцуулахгүй байх шүүхийн шийдвэрт АН буруутай, АН зохион байгуулж байгаа мэтээр ярьсан. Хариуцлагатайгаар мэдэгдэхэд АН үүнд ямар ч хамаагүй, бид ийм бусармаг үйл ажиллагаанд оролцдоггүй.

Өнөөдөр Дархан-Уул аймагт сонгуульд нэр дэвшигчдийг хууль бусаар хассан шүүхийн шийдвэр дахин гарсан. Дархан-Уул аймагт зөвхөн МАН, ХҮН хоёр сонгуульд оролцох гэж байна. Үүн дээр бид улс төр хийгээгүй. Шүүхийн шийдвэр гартал хүлээц хандсан. Гэтэл үүнд эрх баригч нам шүүхэд шууд нөлөөлж байна. Ялангуяа Ерөнхий сайдын томилдог ТЕГ өөрийн чиг үүрэгт хамаарахгүй асуудалд оролцож байна. Сонгуулийн өмнө ТЕГ улс төрийн намуудын дотоод үйл ажиллагаанд оролцохгүй байхыг бид хүсч байна. Сонгуулийг шударга явуулахад ТЕГ саад болж байна. Өнгөрсөн УИХ-ын сонгуулиар ч мөн ТЕГ, цагдаагийн байгууллага, хууль хүчнийхэн бүгд эрх баригч намын талд ажилласан нь иргэдийн дургуйцлийг хүргэсэн. Өнөөдөр ч гэсэн нийгэмд хүндрэл болж байгаа бүх асуудалд АН буруутай мэтээр мэдээлж байна. Түгжрэлд АН буруутай, ХҮН-ыг сонгуульд оролцуулахгүй гэсэнд ч АН бүруутай гэж мэдээлж байна. АН-ыг ийм байдлаар, баримтгүйгээр буруутгахгүй байхыг бид шаардаж байна.