Ерөнхий сайд асан Ч.Сайханбилэг Австралийн эдийн засгийн The Australian Financial Review сонинд Монголын тал “Оюутолгой”-д эзэмшиж буй 34 хувийг зарах нь магадгүй хамгийн тохиромжтой хувилбар байх тухай ярилцлага өгчээ.

Одоо үүсээд буй улс төржилт, Рио Тинто компанийн том компанийн ихэмсэг зан зэргийг шийдэх цор ганц арга нь “Оюутолгой”-д эзэмшиж буй 34 хувиар Рио Тинто эсвэл өөр нэг гуравдагч этгээдэд зарах ётой аж.

“Өнөөдөр үүсээд байгаа нөхцөл байдлыг хялбараар шийдэх ёстой гэсэн санааг дэмждэг. Миний бодлоор манай талаас хамгийн тохиромжтой хувилбар бол одоо эзэмшиж буй 34 хувийг “Рио Тинто” эсвэл өөр гуравдагч этгээдэд зарах ёстой. Дараа нь татварын зохицуулалтыг дахин тохирч, төрөөс татвар болон бусад байдлаар ашиг хүртэх боломжийг нэмэгдүүлэх нь зүй” гэж Ерөнхий сайд асан Ч.Сайханбилэг ярьжээ.

Тэрээр мөн цааш нь ярихдаа 34 хувийн өмчлөлийн асуудал одоо үүсээд буй үл ойлголцлын үндэс гэдгийг онцолжээ.

“2009, 2015 онд “Оюу Толгой”-н гэрээг үзэглэж байхад дийлэнх монголчууд Оюу Толгойг сайн зүйл гэж итгэж байсан. Гэвч популист улстөрчид, хэт үндсэрхэг үзэлтнүүд улс төрийн оноо авах хэрэгсэл болгосон. Одоо бүр Рио Тинто улс орныг цөлмөөд зугтаж байна гэж ярих болсон” гэж Ерөнхий сайд асан Ч.Сайханбилэг яриандаа дурджээ.

“Оюу Толгой” төслийн далд уурхайн бүтээн байгуулалт хойшилсон, коронавируст цар тахлаас шалтгаалан бүтээн байгуулалтын зардал нэмэгдэх зэрэг эрсдэл байгаагаас болж Засгийн газар болон Рио Тинтогийн хооронд үл ойлголцол үүссэн юм.

Түүгээр ч зогсохгүй хоёр талын татварын маргаантай асуудлаас болж Лондон хотын Арбитрын шүүхэд асуудал явж байгаа билээ.

Монгол Улсын Ерөнхий сайдаар ажиллаж байсан Ч.Сайханбилэгийн үзэж буйгаар Рио Тинто компанийн дээрэнгүй зангаа хаяж, Засгийн газартай түншлэх замаар бизнесээ саадгүй явуулах талаар анхаарах хэрэгтэй гэдгийг дурдсан байна.

Эх сурвалж: zindaa.mn