Олон улсын хөл бөмбөгийн холбооноос /ОУХБХ/ Монголын эмэгтэйчүүдийн хөл бөмбөгийг дэмжих зорилгоор хагас ам.доллар буюу 1.4 тэрбум төгрөгийг олгожээ. Энэ талаар Монголын хөл бөмбөгийн холбооны дэд ерөнхийлөгч Х.Азжаргал Монголын эмэгтэйчүүдийн лигийн сугалааны арга хэмжээний үеэр мэдээлжээ.
Х.Азжаргал "ОУХБХ-оос COVID-19 цар тахлын үед гишүүн холбоодын эмэгтэйчүүдийн хөл бөмбөгийг дэмжих зорилгоор халамжийн сангаас 500,000 ам.долларын мөнгөн тусламжийг олгосноор клубүүдийн үйл ажиллагааг дэмжих бүрэн боломжтой болж ирсэн сайхан мэдээг дуулгахад таатай байна" гэжээ.
Энэ жил Монголын эмэгтэйчүүдийн лигийн тэмцээнд нийт 11 баг оролцохоор мэдүүлгээ өгсний хоёр нь орон нутгийн буюу Өвөрхангай, Ховд аймгийн багууд байна.
ОУХБХ-оос ирүүлсэн мөнгөн тусламжийг эрэгтэй дээд лигийн клубүүдэд урамшуулал хэлбэрээр олгосон бол эмэгтэй дээд лигт оролцож байгаа 11 клуб тус бүрд 5 сая төгрөг, 2 ээлжийн тоглолтын хувцас, 5 ширхэг бөмбөг зэргийг хандиваар олгож байгаа аж.
"Мөн цаашид эмэгтэй багтай ажиллаж байгаа дасгалжуулагчидтай гэрээ байгуулан нэг жилийн хугацаанд сар бүр 500,000 төгрөг хүртэл цалин олгож, бүх насны охид эмэгтэйчүүдтэй ажиллаж байгаа гишүүн байгууллага, клубүүдийг дэмжин, грассрүүтс, сургалт семинар, воркшоп зэрэг олон талт үйл ажиллагаа зохион байгуулахаар төлөвлөж байгааг дуулгая" гэж Х.Азжаргал ярьсан юм.
Монголын хөлбөмбөгийн холбоо /МХБХ/-ны эмэгтэй хөлбөмбөгчдийн амжилтын түүхээс дурьдвал, МХБХ нь 2015 онд шинэ бүтэц бүрэлдэхүүнээр ажиллаж, нэн тэргүүнд 9 насны шигшээ багийг байгуулж, тэднийг тогтмол бэлтгэл сургуулилтаар хангах ажлыг эхлүүлэхдээ эмэгтэй 14 хүртэлх, 19 хүртэлх болон насанд хүрэгчдийн шигшээ багууд багтсан юм. Энэ нь холбооны хөгжлийн бодлогын нэг чухал ажил байсан бөгөөд охид, эмэгтэй тамирчдын оролцоог нэмэгдүүлэх, цаашлаад эмэгтэй шигшээ багийг бүрдүүлэн тив дэлхийн чанартай, уралдаан тэмцээнд оролцох үүд хаалга нээгдсэн гэж болно.
Улмаар Ази тивдээ тэргүүлэгч, дэлхийд хүчтэй өрсөлдөгч гэгддэг Японы Хөлбөмбөгийн холбоотой хамтын ажиллагааны санамж бичиг байгуулж, энэ хүрээнд 14 хүртэлх насны шигшээ багийг бүрдүүлсэн. Япон улсын мэргэжилтэн, дасгалжуулагч Ики Ёожи тус багийг удирдаж тивийн чанартай хэд хэдэн тэмцээнд амжилттай оролцсон юм. Дасгалжуулагч Ики Ёожи Монголын эмэгтэй хөлбөмбөгийг хөгжүүлэхэд үнэтэй хувь нэмэр оруулсан бөгөөд 3 жилийн турш өсвөрийн шигшээ багийг дасгалжуулахдаа амжилттай ажилласныг өндөр үнэлж МХБХ-ны “Гавьяаны одон”-гоор шагнаж байсан юм.
2018 онд Зүүн Азийн Аварга шалгаруулах тэмцээнийг МХБХ нутагтаа хүлээн авсан юм. Анх удаа эмэгтэй үндэсний шигшээ багийг байгуулан анхны олон улсын тэмцээнд бэлтгэсэн 3 жилийн үр шим гарсан амжилт үзүүлсэн түүхтэй.
Одоогоос 2 жилийн өмнө буюу 2018 оны Есдүгээр сарын 2-нд ахлах дасгалжуулагч Ики Ёожи болон Ц.Ганболд дасгалжуулагчтай Монголын эмэгтэй шигшээ баг, Гуамын шигшээ багийг 1:0-ээр хожиж анх удаагаа Зүүн Азийн аварга шалгаруулах тэмцээний эхний шатыг давж гарсан түүхтэй билээ.