УИХ-ын гишүүн Б.Пүрэвдорж өнөөдөр НӨАТ-ын тухай хуулийн буцаан олголтыг 5 хувь болгох тухай хуулийн төслийг УИХ-ын даргад дахин өргөн барилаа.

Тэрээр Өнгөрсөн хавар энэ хуулийн төслийг өргөн барьсан ч олонхын дэмжлэг аваагүй юм. Тиймээс шинэ парламентэд уг хуулийн төслийг дэмжих байх гэж үзээд дахин өргөн барьсан байна. 

УИХ-ын гишүүн Б.Пүрэвдорж:

-"Цар тахлын улмаас улс орон эдийн засгийн хүндрэлтэй нөхцөл байдалд байна. Цар тахалтай холбоотойгоор Засгийн газар өнгөрсөн хугацаанд 5,2 их наядын хөтөлбөр хэрэгжүүлсэн. Хэрэв энэ хөтөлбөр хүндээ бүрэн хүрч чадсан бол иргэн бүрт 1,6 сая төгрөг очих ёстой байсан. Харамсалтай нь тийм зүйл болсонгүй. Ковидын эсрэг авч байгаа арга хэмжээ байгаа онож байна уу, үгүй юу гэдэг эргэлзээтэй байна.

Тийм учраас ард иргэдийн амьдралд дарамт болж байгаа НӨАТ-ыг багасгах замаар иргэдийн орлогыг нэмэгдүүлэх боломж байна. Энэ 2020 онд нийт 2,7 их наяд төгрөгийн орлогыг НӨАТ-ын орлогоос бүрдүүлэхээр Сангийн яам төлөвлөсөн байгаа. Татварын хувь хэмжээг буулгаснаар ойролцоогоор нэг их наяд төгрөгийг иргэддээ буцаан өгөх боломжтой ийм хуулийн төсөл юм.

Иргэдийн олонхи нь НӨАТ-ыг нэг удаагийн 10 хувийн татвар гэж ойлгодог. Гэтэл үнэн хэрэгтээ үйлдвэрлэлийн бүх шат дамжлагууд дээр тус бүртээ 10 хувийн татвар төлдөг. Үр тарианы компаниуд хамгийн гол зардал болох шатахууны өртөг дээр 10 хувийн татвар нэмж төлдөг. Үр тариагаа хураачхаад гурилын үйлдвэрт нийлүүлэхдээ 10 хувийн өртөг нэмдэг. Гурилын үйлдвэр нь талхны үйлдвэрт бас л 10 хувийн нэмэгдэлтэй өгдөг. Талхны үйлдвэрээс дэлгүүрт талхаа нийлүүлэхдээ 10 хувийн нэмэгдэлтэй өгдөг. Дэлгүүр нь жирийн иргэдэд 10 хувийн нэмэгдэлтэй өгдөг. Үйлдвэрлэлийн шат дамжлага бүрээс авч байгаа энэ татварууд хамгийн багадаа 300-400 төгрөгийн нэмэгдэл үүсгэдэг гэсэн судалгаа байдаг.

Тиймээс энэ татвар бол алслагдсан бүс нутагт амьдарч байгаа иргэдэд маш их дарамт болдог. Тиймээс НӨАТ-ын татварын буцаан олголтыг таван хувь болгох нь хамгийн зөв шийдвэр гэж үзээд хуулийн төслөө дахин өргөн барилаа” гэв.