Монголын Үндэсний олимпын хорооны ээлжит бус хурал өнөөдөр болж, шинэ ерөнхийлөгчөөрөө Найдангийн Түвшинбаярыг сонголоо.
МҮОХ-ны Ерөнхийлөгчийн сонгууль явагдаж, нэр дэвшигч Монгол Улсын хөдөлмөрийн баатар, Гавьяат тамирчин, "Бээжин-2008" Олимпын аварга Н.Түвшинбаяр нийт гишүүдийн олонхийн буюу 96,4 хувийн саналаар МҮОХ-ны Ерөнхийлөгчөөр сонгогдлоо.
Өмнөх ерөнхийлөгч Д.Загдсүрэн эрүүл мэндийн шалтгаанаар ажлаа 2019 оны аравдугаар сард өгсөн бөгөөд дараагийн удирдлагыг сонгох хурал энэ оны эхээр болох байсан ч COVID-19-тэй холбоотойгоор хойшилсоор ийнхүү өнөөдөр болж байна.
МҮОХ 176 гишүүнтэй бөгөөд хурал 74%-ийн ирцтэйгээр болж өндөрлөв.
Олимпын ууган аварга Н.Түвшинбаярын хувьд Монголдоо олимпизмын үзэл санааг хөгжүүлэхэд хамгийн их хувь нэмэр оруулсан хүн билээ. Тиймээс түүнийг ирэх дөрвөн жилд эл үзэл санааг улам түгээн дэлгэрүүлж, Монгол Улсын тамирчид олимпод амжилт үзүүлэхэд илүү их хувь нэмрээ оруулж чадна хэмээн спортын хамт олон нь үзэж, ийнхүү итгэл хүлээлэглээ.