Японы мэргэжлийн сүмо бөхийн Нагоя башёгийн найм дахь өдрийн барилдаанууд өчигдөр/2020.07.26/ Токио хотын Рёогокү Кокүгикан ордонд болж өндөрлөлөө. Цар тахлын улмаас 2500 үзэгчийг л ордонд орохыг зөвшөөрч буй Нагоя башёгийн найм дахь өдөр Хакүхо Шоо Кагаяакитай тааран барилдсан бол озэки Асанояама Аойяаматай учраа таарав.

Ёкозүна Какүрюү Ананд гэмтлийн улмаас башёг үргэлжлүүлэх боломжгүй болсон учир Хакүхо энэ удаагийн башёд барилдаж буй ганц Ёкозүна цолтой бөх болсон. Тэрбээр нагоя башёгийн найм дахь өдөр Кагаяакиг давж, найм дахь ялалтаа авсан бол Кагаяаки гурав давж, тав унасан үзүүлэлттэйгээр башёг үргэлжлүүлж байна.

Ёкозүна Хакүхо 50 дахь удаагаа нэг ч уналгүйгээр качикоши хийлээ. Тэрбээр өмнө нь 49 качикоши хийхдээ 34-т нь тухайн башёдоо түрүүлж байжээ.

Харин Ёкозүна Какүрюү Анандын эзгүйд барууныг манлайлж буй шинэхэн озэки Асанояама башёгийн найм дахь өдөр Аойяаматай тааран барилдаж, өрсөлдөгчөө давлаа. Асанояама башёг найман даваатай нэг ч унаагүй Хакүхогийн адилаар башёг тэргүүлж байна.

Тэрүнофүжи Ган-Эрдэнэ энэ өдөр Нишикигитэй тааран барилдаж улмаар өрсөлдөгчөө давснаар долоон даваа нэг унаатай явж байгаа бол Тамаваши Мөнх-Оргил Токүшорюүтой тааран барилдаж ээлжит ялалтаа авч зургаа давж, хоёр унасан үзүүлэлттэй байна.

Одоогийн байдлаар Хакүхо, Асанояама нар найман даваатай, нэг ч унаагүй башёг тэргүүлж байгаа бол тэдний араас Шодай, Митакеүми, Тэрүнофүжи Ган-Эрдэнэ нар долоон даваа нэг унаатай удаалж байна.