Баянхонгор аймгийн Ардчилсан намын дарга Д.Ширмэний иргэд сонгогчидтой хийсэн уулзалтын үеэр хэлсэн үгнээс хүргэж байна. 

Д.Ширмэн:

Сонгууль гэдэг бодлогыг өрсөлдөөн байх ёстой. Харамсалтай нь, өнөөдөр байдал ийм биш байна. 
Би энэ удаад УИХ-ын дарга Г.Занданшатар, эрхэм гишүүн Л.Элдэв-Очир нарт хандаж, цэвэр өрсөлдөе  гэж уриалмаар байна.  Их хурлын дарга шиг зангарагтай бай.  Манай нэр дэвшигчид сумдаар уулзалт хийгээд явахад биднийг хүн дагаж, бичлэг хийж байна. Яах гэж ингэж байгаа юм бэ? 
Төрийн том аппарат дагуулж явж байж яагаад биднээс айгаад байгаа юм. 
Монголчуудыг талцуулж, хөдөө орон нутгийнхний хооронд нь муудуулцах арчаагүй явуургүй ажлаа зогсоо.  
Хэн нэгэн эндээс сонгогдоод явахад Баянхонгорт Баянхонгорынхон л үлдэнэ. 
Би улстөрийн соёл гэдгийг энэ хүмүүст ойлгуулахыг хичээж байна. Хойч үедээ зөв соёл, зөв бодлогыг үлдээмээр байна. Алийн болгон бид талцаж, хуваагдаж хоёр тийшээ явах вэ? 
Төрийн хүн, төрийн өндөр албан тушаалтан хүн хүмүүсийг араасаа зөв зам руу дагуулах ёстой. Ямар ч хүн зөв мөртэй мөртэй, дараа нь хэний ч өмнө инээгээд явж чаддаг байх ёстой. 

Сонгуулийн өдрүүдэд манай нэр дэмжигчдийг асар ихээр гүтгэлээ.  Манай нэр дэвшигчдийг нэр дэвших сургаар сошиалаар АТГ-т “баривчлуулчихсан”. Яллагдагчаар татагдсан, баривчлагдсан гэсэн маш их гүтгэлгийг тараасан. Одоо ч манай нэр дэвшигчдийг элдэв худлаа мэдээллээр харлуулж байна.
Сонгуулийн сурталчилгаа дуусах өдрүүдэд ямар үйл явц өрнөхийг хэлэхэд хэцүү. Троллууд хуурамч хаягнаас худлаа мэдээлэл, зурган эвлүүлэг тарааж байна. Манай хонгорчууд үнэн худлыг ялгах ухаантай гэж би итгэж байна. 
Бид бүгдээрээ нэг үндэс угсаатан, адилхан монголчууд, нэг гарвалтай баянхонгорчууд.  
Сонгууль гэдэг үзэл бодлын мэтгэлцээн, хийх ажлын уралдаан болохоос биш, албан тушаалын наймалцаан, эрх мэдлийн тэмцэл, албан тушаал, төрийн эрх мэдлээр далайлгах зүйл биш,  уучлаарай.  
Айл гэр болгон орлоготой, иргэн болгон ажилтай байх л бидний зорилго.  Хүн таатай орчинд амьдраад ирэхээрээ сэтгэл сайхан тэнүүн байдаг. Бидний хамгийн үнэтэй зүйл бол монгол хүн. Эрхэм монгол хүн таныг мэргэн сонголт хийгээрэй.  Гэр бүл, үр хүүхэд, элгэн садныхаа төлөө сонголтоо хийгээрэй гэж хэлмээр байна. 
Сонгууль болгоноор мөнгө тараах гэсэн асуудал яригддаг. Мөнгө тараадаг үнэгүй зүйл гэж байдаггүй, дараа нь татвар чинь нэмэгдэнэ, эргүүлээд танаас авчихна. Иймээс мөнгөнд бүү хууртаарай. Танд мөнгө өгч байвал ав. Гэхдээ үзэл бодол, итгэл үнэмшлээрээ сонголтоо хийгээрэй.
Эцэст нь царцаа гэж дайсан бидэнд бий. Баянхонгорт царцаа ирчихсэн байгаа шүү. 
Баянхонгорчууд бидний хувь заяаг "царцаа" шийдэхгүй, тэд “нисээд” л явчихна. Хонгорчууд бид өөрсдөө хувь заяагаа шийдэх ёстой шүү гэдгийг хэлмээр байна. Та бүхэндээ амжилт хүсье.