Сонгогчдын гэрийн хаяг дээр огт хамааралгүй хүн нэмж бүртгэн, сонгуулийн саналыг луйвардах оролдлого гарч буй баримтыг дэлгэж, Чингэлтэй дүүрэгт бие даан нэр дэвшигч Дагдангийн Анхбаяр мэдээллэв.

Сүхбаатар дүүргийн сонгогчдын нэрийн жагсаалтаас үзэхэд Д.Анхбаярын гэрийн хаяг дээр гэр бүлээс нь гадна огт танихгүй Д.Алтансарнай, Б.Түвшинбаяр гэх 2 иргэн нэмж бүртгэгдсэн байна. Энэ бол нэг иргэнийг олон газар бүртгэн санал өгүүлж сонгуулийн үр дүнг луйварддаг бохир аргын тодорхой, ноцтой баримт юм хэмээн тэрбээр үзэж байгаа тул УИХ-ын сонгуульд эрх барьж буй намынхаас бусад нэр дэвшигчид, болон иргэдэд хандан сонгогчийн нэрсийн жагсаалтаа хариуцлагатайгаар нягталж, шалган баталгаажуулахыг уриаллаа. 

Мөн яг өнөөдрийн байдлаар хэсгийн хороонд байгаа 2020 оны УИХ-ын сонгуулийн сонгогчдын нэрийн жагсаалтыг нэр дэвшигчдэд тэгш олгож, шалгах, хянах боломж олгох шаардлагыг ҮАБЗ-ийн тэргүүн, Ерөнхийлөгч Х.Баттулгад хүргүүлсэн байна.