ОУХМ Б.Одбаяр /Одгий/:

ХУУЛЬ ХҮМҮҮСТ ТЭГШ ҮЙЛЧЛЭХГҮЙ БАЙГААД БИД ДУРГҮЙ

-Би Төв аймгийн унаган хүүхэд. Одоогоор гэр бүлтэйгээ Сидней хотод ажиллаж амьдарч байна. Эндхийн амьдралын хэв маяг Монголынхоос өөр. Австраличууд улс төрийн соёлын хувьд ч монголчуудаас нэлээд ялгаатай. Саяхан Ерөнхий сайд нь айлын зүлгэн дээр зогсчихсон яриа өгч байтал гэрийн эзэн гарч ирээд, зөвшөөрөлгүй гэрийнх нь зүлгэн дээр зогсож байгааг анхааруулж, Ерөнхий сайд уучлал гуйн асуудлаа эв найртай шийдээд явцгаасан. Манайд бол улстөрчид хулгай хийж, ЖДҮ зээл хууль бусаар завшчихаад уучлал гуйдаггүй, биеэ өмөөрөн хэрэлдсээр байгаад дуусдагт би дургүй. Гэтэл гадуур зугаалж явсан залуус жижиг зодоон хийхэд л ял аваад шоронд ордог. Хууль ёс хүмүүст тэгш үйлчлэхгүй байна шүү дээ.

Х.Тэмүүжин сайд байхдаа хуулийн салбарын шинэчлэлийг зоригтой эхлүүлж байсныг мэднэ. Цэгц шулуун, зоримог улстөрч гэж боддог. Бас хуулийн салбарыг шинэчилж, үйл ажиллагааг нь ил тод болгох, жирийн иргэдэд дээрэлхдэг биш иргэндээ үйлчилдэг болгох бодлогыг нь дэмждэг. Сайн бодлоготой, хэрэгжүүлэх хөтөлбөртэй улстөрчийг бол ажлаа дуустал хийгээсэй гэж боддог. Зарим чухал бодлогыг хэрэгжүүлэхэд дөрвөн жил хангалттай биш байж ч магад. Сонгууль амьдралын суурь нөхцлийг шийддэг чухал үйл явдал учраас хариуцлагатай хандаж, сонгуульдаа идэвхтэй оролцоорой гэж залуустаа захья.

МУГЖ, дуучин Г.Ариунбаатар:

ТӨВ НУТГИЙНХАНД МААНЬ АЛДАЖ БОЛОХГҮЙ БОЛОМЖ ТОХИОСОН

-Манай нутгийнхан хүнийг алаг үзэж, адалж ялгадаггүй, цагаан цайлган ард түмэн. Энэ зан чанар өнгөрсөн жилүүдэд бидний хөгжлийн боломжийг хойш татах шалтаг болсон юм болов уу гэж сүүлийн үед санагдах болсон. Бидний санал, дэмжлэгээр 20 жил тасралтгүй сонгогдож, төр түшилцсэн улстөрчид юу хийсэн бэ гэдгийг дор бүрнээ бодож үзэцгээе.

Миний хувьд энэ удаагийн сонгуульд нутгийн ах, хуульч Хишигдэмбэрэлийн Тэмүүжинг анх удаа төрсөн нутгаасаа нэр дэвшиж өрсөлдөж байгаад маш их баярлаж, талархан дэмжиж байна. Хууль зүйн сайдаар ажиллахдаа хуулийн салбарт хийсэн шинэчлэлийг нь бидний зарим нь тухайн үед ойлгож анзаараагүй өнгөрсөн байж болох ч одоо эргээд харахад зөв зүйтэй шинэчлэл байжээ гэдгийг өнөөдөр бид яс махандаа тултад ойлгож байна. Өөрчлөлт шинэчлэлтийн үр дүн алга урвуулахын дайтай хурдан харагддаггүй юм байна. Цаг хугацаа өнгөрсний дараа үр дүн нь харагддаг юм байна.

Тиймээс энэ хүний бодож төлөвлөж яваа, хийж эхэлсэн, дуусгаж амжаагүй олон ажлыг дуусгах ёстой юм байна. Үүний төлөө Төв нутгийнхан маань зөв сонголт хийгээсэй шнэ хүсэх байна. Өмнө олон удаа хийсэн сонголтоо энэ удаад өөрчлөөд үзэхгүй бол дахиад бахь байдгаараа ирэх дөрвөн жилийг үдэж магадгүй байна.

“Comedy Lab” Д.Амартүвшин:

УЛСТӨРЧ ХҮН ӨӨРИЙН ГЭСЭН ҮЗЭЛ САНАА, ЧИГ ШУГАМТАЙ БАЙХ ЁСТОЙ

Би хуулийн сургууль төгсөөгүй. Гэхдээ миний үзэл санааны үндэс суурийг тавьсан хүн бол Х.Тэмүүжин багш. Өөр хэн ч биш. Улстөрч хүн өөрийн гэсэн үзэл санаа, онолтой, чиг шугамтай байх ёстой. Бүхий л нийгмийн үед олонхиос арай өөрөөр сэтгэж байгаа хүмүүс дандаа ад үзэгдэж ирсэн. Олонхи бол дандаа сэтгэл хөдлөл дээр суурилж хөдөлдөг. Юмыг илүү суурьтай харж байгаа хүмүүс нь нийгэмдээ дандаа ялгаварлагдаж ирсэн. Цаг хугацааны явцад тэр хүмүүсийн зөв байжээ гэдэг нь тодорч гарч ирдэг. Тэмүүжин багш маань тийм л хүмүүсийн нэг юм болов уу гэж боддог.

Миний, залуус бидний хүсч байгаа зүйл гэвэл улс төрд шинэ үе орж ирээсэй. Хүссэн хүсээгүй, малчин хүн хүртэл хуц, ухнаа сольдог биз дээ. Хуучин үеийнхэн 30 жил төр барилаа. Арав, хорин жил төр барьсан хүмүүс үеэ өнгөрөөж байна. Тийм учраас энэ удаагийн сонгуулиар залуу хүмүүс гарч ирэхээс өөр аргагүй. Манай багш тэр залуу үеийг манлайлах хүмүүсийн нэг гэж бодож байна.