Ховд аймаг, УИХ-ын сонгуулийн 16-р тойрогт Ардчилсан намаас УИХ-ын гишүүн, Ардчилсан намын дэд дарга Б.Пүрэвдорж, Монгол Улсын Ерөнхийлөгчийн зөвлөх, Ховд хөгжлийн төлөө сангийн тэргүүн Ш.Адьшаа, УИХ дахь АН-ын бүлгийн зөвлөх, АН-ын улс төрийн зөвлөлийн гишүүн Н.Пунцаг нар нэр дэвшиж байна.

Нэр дэвшигчдийн уулзалтын үеэр Ховд аймгийн уугуул, “Хүнлэг үйлстэн” холбооны үүсгэн байгуулагч, УИХ дахь АН-ын бүлгийн зөвлөх, АН-ын улс төрийн зөвлөлийн гишүүн Нэргүйн ПУНЦАГТАЙ цөөн хором ярилцлаа.

-УИХ-ын өнгөрсөн дөрвөн жилийг Та юу гэж харж байна вэ?

-Урьд өмнөх сонголтын үр дүнг ямар байгааг Та бид харсаар, мэдэрсээр байгаа. Биднийг төрд төлөөлж буй эрхмүүд иргэдэд очих боломжийг хулгайлж төсвийг үрэлгэн зарцуулж ах дүү амин хувьдаа шиг хонжоо олж  өөрсдөө өндийсөөр энгийн иргэд харин сөхөрч байна. Монголын улстөрчид хууль батлах, бодлого хэрэгжүүлэх тухай хангалттай их ярилаа. Эдийн засгийг сайжруулна, авлига хээл хахуулыг бууруулна гэсэн том том амлалтаа хэрэгжүүлсэнгүй, үр дүн гарсангүй. Өөрсдөө амьдралаас тасарч харин сонгууль болоход сонгогчдоо эргэж санадаг болсоор олон жил боллоо.

-Одоо улстөрчид ямар ажил хийх ёстой вэ?

-Угтаа бол төр улсын бодлого иргэн рүүгээ чиглэсэн иргэдийн амьдралд нөлөөлдөг байх үндсэн үүргээ биелүүлдэг байх ёстой. Төр иргэдээс авсан татварыг зөв зарцуулж зөв зохион байгуулж, ЖДҮ-ийг хөгжүүлж ажлын байр бий болгон ажилгүйдэл, ядуурлыг бууруулах бодитой ажил үгүйлэгдэж байна. Өнөөдөр хэт улстөржилт, бүлгэрхэг байдлаас ангижирч улс аймаг, орон нутгийг цоо шинэ бодлого, арга барилаар удирдах дорвитой өөрчлөлт хийхгүй бол бид шударга бус, тэгш бусын шавартаа гүн шигдсэн чигээрээ үлдэнэ. Та бүхэн сонголтоо зөв хийгээрэй. Та бүхний итгэлийг алдахгүй, иргэдийн үгийг сонсч, шийдвэр гаргах түвшинд иргэдийн үгийг хүргэж чадах төрийн түшээд Монголд өнөөдөр хэрэгтэй байна. Иргэн бүр орлоготой, өрх бүр өсөлттэй байж иргэн баян, улс хөгжинө.

Б.ОД