Беларусын Ерөнхийлөгч Александр Лукашенко засгийн газраа танхимаар нь огцрууллаа гэж төрийн өмчийн “Беларусь-1” телевиз мэдээлжээ. Засгийн газрыг огцруулах зарлигт Ерөнхийлөгч зургадугаар сарын 3-нд гарын үсэг зурсан гэж энд дурдсан байна.

Александр Лукашенко үүний өмнө Үндэсний аюулгүй байдлын зөвлөлийн нарийн бичгийн дарга, Ерөнхийлөгчийн Тамгын газрын дарга, төлөөлөгчдийн танхимын дарга, парламентын дээд танхимын тэргүүн нарыг байлцуулсан зөвлөлдөөн дээр Засгийн газрын шинэ танхимын тухай саналаа хэлж байжээ. Засгийн газрын бүрэлдэхүүнийг сольсны дараа “Хувьсгал гарахыг хүлээх хэрэггүй” гэж Ерөнхийлөгч онцлоод коронавирус COVID-19-ийн халдвар, цар тахлаас болоод “дэлхий дахин урьд хожид байгаагүй хямралын ирмэгт тулаад” байгаа үед Засгийн газарт томоохон өөрчлөлт хийх нь хүссэн хүсээгүй хэрэгтэй гэсэн байна.

Энэ оны наймдугаар сарын 9-нд болох Ерөнхийлөгчийн сонгуулиас өмнө Засгийн газрын шинэ бүрэлдэхүүнийг бүрдүүлэх төлөвлөгөөгөө А.Лукашенко тавдугаар сарын 25-нд зарласан. Ерөнхийлөгчийн сонгуульд өнөөгийн төрийн тэргүүнийг нэр дэвшүүлж байгаагаа Засгийн газрын шинэ танхим зарлавал сонгогчдын итгэл үнэмшлийг нэмэгдүүлнэ гэж А.Лукашенко үзэж байгаа аж.

2018 онд байгуулсан Сергей Румас тэргүүтэй Засгийн газар, түүний албан тушаалтнуудад Ерөнхийлөгч Александр Лукашенко таагүй ханддаг болсноос ийн огцруулж байгаа гэж эх сурвалжууд хэлжээ. Оршо хотод болсон зөвлөгөөн дээр Беларусын Ерөнхийлөгч А.Лукашенко сайд нарыг юу ч хийхгүй байна гээд тэднийг үл тоомсорлосон, ажил санаатайгаар тасалдуулдаг байдлыг шүүмжилж байв.