Япон улсын Ерөнхий сайд Абэ Шинзо өчигдөр мэдэгдэл хийж коронавирусийн халдвар тархалтыг хяналтад авсан 39 мужид тогтоосон байсан онцгой байдлын дэглэмийг цуцалжээ.
Ингэснээр тухайн мужуудад бизнесийн үйл ажиллагааг аажмаар сэргээх боломжтой болжээ.
Япон улс нь 47 мужтай юм.
Харин Токио, Осака зэрэг хотын бүс нутагт халдварын шинэ тохиолдлын тоо үргэлжлэн буурч, эмнэлгийн ачаалал багасах хүртэл онцгой байдал зарласан хэвээр байж, хүмүүсийг гэрээсээ гарахгүй байхыг уриалсан байна.
Онцгой байдлын дэглэмийг цуцалсан мужуудаас халдварын олон тохиолдол бүртгэгдсэн Ибараки, Ишикава, Гифү, Айчи, Фүкүокаг онцгой ангилалд оруулжээ. Харин Хоккайдо, Токио хотын бүс, Чиба, Канагава, Сайтама, Киото, Осака, Хиогод онцгой байдлын дэглэмийг тогтоосон хэвээр байх бөгөөд эдгээр мужид тус улсын нийт хүн амын 50 орчим хувь нь оршин суудаг юм.
Япон улс халдварын тохиолдол нэмэгдэхээс сэргийлж чадсан хэдий ч өнөөдрийн байдлаар 16800 гаруй халдварын тохиолдол бүртгэгдэж, 726 хүн нас бараад байна.
