Энэ жил төсөвлөсөн 3.1 их наяд төгрөгийн хөрөнгө оруулалтын бүтээн байгуулалтад дотоодын 15 мянган ААН оролцоно. Үүгээр тооцоход 150 мянган ажлын байрыг хадгалж үлдэнэ гэж Сангийн яамнаас мэдээлэв. 

Хэдийгээр "COVID-19"-тэй холбоотойгоор төсвийн орлого буураад байгаа ч улсын төсвийн хөрөнгө оруулалтаар хийх бүтээн байгуулалтын бүх ажлыг санхүүжүүлнэ гэж Сангийн яамнаас мэдэгдэж байна. 

Тухайлбал, "Чингис хаан" музейн барилгад 53 тэрбум төгрөг төлөвлөж, бүтээн байгуулалтын ажлыг эхэлсэн. Мөн Байгалийн түүхийн музейн шинэ барилгад нийт 94.4 тэрбум төгрөг шаардлагатай байгаагаас энэ жилийн төсөвт 32 тэрбум төгрөгийг суулгасан. Үүнээс гадна эмнэлэг, сургууль, цэцэрлэг зэрэг бусад, шинээр болон өмнөх онуудад ажлыг нь эхлүүлсэн бүтээн байгуулалтыг санхүүжүүлж ажиллахаа Сангийн сайд Ч.Хүрэлбаатар мэдэгдэж байна.

Тэрээр, "Эдийн засаг шинэ коронавирусээс болж агшаад эхэлж байхад дээр нь бид төсвөө танаж хасах юм бол харин энэ нь урт хугацаанд үргэлжлэх гүнзгий хямрал руу түлхэх болно. Тийм учраас Сангийн яам анхнаасаа төсвөө тэлсэн бодлогоо үргэлжлүүлэх зарчмаар ажиллаж байна. Өнөөдөр худалдан авах үйл ажиллагааны тайлангаар 2020 оны төсөвт тусгасан 3.1 их наяд төгрөгийн хөрөнгө оруулалтын бүтээн байгуулалтад нийт 15 мянган ААН ажиллахаар байна. Энэ дээр барилгын дотоод засал, бусад туслан гүйцэтгэлээр ААН-үүд мөн нэмэгдэж орж ирнэ. Үүгээр тооцоход 150 мянган ажлын байр бий болохоор байна" гэв. 

Худалдан авах үйл ажиллагааны тайлангаар 2020 оны төсөвт тусгасан 3.1 их наяд төгрөгийн хөрөнгө оруулалтын бүтээн байгуулалтад нийт 15 мянган ААН ажиллана.

Нэг ёсондоо төсвийн хөрөнгө оруулалтаар хийх ажлыг үргэлжлүүлснээр ажлын байраа хадгалж авч үлдэх боломж бүрдэнэ гэж үзэж байна. Харин орлогыг бүрдүүлэхэд гадаадын зээл тусламжийг "COVID-19"-тэй холбоотойгоор эрүүл мэндийн салбарт техник тоног төхөөрөмж авч хангамжийг сайжруулахад нэлээн ажлыг хийлээ. Гэхдээ гадаадын зээл тусламж гэхээс илүү дотоод нөөц бололцоо, бизнесээ идэвхжүүлж байж орлогоо нэмэгдүүлж аюулгүй байдлаа хангаж ажиллана гэж Сангийн яамнаас мэдэгдэж байна. 

Төсвийн хөрөнгө оруулалтаар хийх ажлыг гүйцэтгэх ААН-үүд сонгон шалгаруулалтаар тодорсон нөхцөлд санхүүжилтийг тухай бүр хийж ажиллахаа тус яам мөн мэдэгдэж байна.