АН-ын Геологи, уул уурхай, газрын тосны бодлогын зөвлөлийн дарга Б.Ариунболд дөнгөж сая нэгэн “ноцтой” мэдээллийг олон нийтийн сүлжээгээр цацлаа.

Байгаль орчин, аялал жуулчлалын сайд Н.Цэрэнбат өнгөрөгч сард Үл хөдлөх эд хөрөнгийн албан татварын тухай хуульд нэмэлт өөрчлөлт оруулах тухай хуулийн төслийг УИХ-д өргөн барьсан байна. Өнөөдрийг хүртэл нийтэд ил болоогүй байгаа уг хуулийн төсөлд Богдхан уулын тусгай хамгаалалттай газар нутагт оршин сууж байгаа иргэдээс үл хөдлөх хөрөнгийн албан татвар авахаар тусгажээ.

Уг хуулийн төслийг өргөн барихдаа Н.Цэрэнбат сайд Засгийн газрын кабинетаараа хэлэлцүүлэлгүй, УИХ-ын гишүүний хувиар төсөл өргөн барьсныг АН-ын Бодлогын зөвлөлийн дарга “хуулийн хулгай” гэж нэрлэв.

Өнгөрөгч 2016 оны сонгуулиар олонхи болж засгийн эрх авсан МАН сонгогчдод “Татвар нэмэхгүй, шинээр татвар бий болгохгүй” хэмээн амласан билээ. Мөн дээр нь цар тахлын хөнөөлийн улмаас дэлхий нийтээрээ /монголчууд мөн ялгаагүй/ эдийн засгийн хямрал, сүйтгэлд автаж, иргэдийн орлого хомсдон худалдан авах чадвар буураад байгаа энэ үед У.Хүрэлсүхийн Засгийн газар “Эдийн засгийг дэмжих, иргэдийн орлогыг бууруулахгүй байх” тухай янз бүрийн хөтөлбөр зарлаж, түүндээ зориулан таван их наяд төгрөгийг УИХ-ын шийдвэргүйгээр захиран зарцуулах эрхийг өөртөө аваад байгаа.

Гэтэл кабинетийн нэг сайд нь дангаараа татвар нэмэгдүүлэх тухай хууль боловсруулан УИХ-д өргөн барьсан явдлыг АН-ын Бодлогын зөвлөлийн дарга “хуулийн хулгай” хэмээн нэрлэсэн бөгөөд хэрвээ Засгийн газар энэ төслийг дэмжсэн бол “нэг гараараа өгч, нөгөө гараараа авч” буй хэрэг юм.

Б.Ариунболд энэ тухай “Монгол Улсын иргэн оршин суух газраа чөлөөтэй сонгох эрхтэй. Гэтэл энэ татвар нь иргэдээ оршин суугаа газар, нутгаар нь ялгаварлаж, татварын ялгаатай бодлого хэрэгжүүлж буй явдал” хэмээн үзэж, үүний эсрэг энэ бүсэд амьдарч, оршин сууж байгаа иргэдийн төлөөлөн шийдвэртэй тэмцэхээ мэдэгдэв.

Хуулийн төсөлд нэг м.кв тутамд 1000 төгрөгийн татвар ногдуулахаар тогтоосон нь 80 метр кв байранд оршин суугаа иргэд жил бүр 80 мянган төгрөгийг Үл хөдлөх эд хөрөнгийн татварт төлнө гэсэн үг. Мөн уг хуулийн төсөл батлагдвал үйлчлэл нь зөвхөн Богдхан уулсын тусгай хамгаалалттай бүс буюу Зайсан, Яармаг буюу Хан-Уул дүүрэг, Баянзүрх дүүргийн зарим иргэд хамаарна. 

Уг нь энд оршин сууж буй иргэд "тусгай хамгаалалттай бүсэд газар эзэмшихэд ногдуулдаг жишгээр газрын татвар төлдөг. Гэтэл дээр нь нэмээд Үл хөдлөх эд хөрөнгийн албан татвар ногдуулахаар болсон нь зөвхөн эдгээр иргэдэд зориулсан шинэ төрлийн татварыг бий болгож буй хэрэг юм.