Өнөөдөр төр нийгмийн нэрт зүтгэлтэн С.Зоригийн төрсөн өдөр. Тэр өнөөдөр амьд сэрүүн байсан бол 58 нас хүрэх байлаа.
Энэ өдрийг тохиолдуулан АН-ын удирдлага гишүүд дэмжигчид болон С.Зориг агсны гэр бүл, төрөл төрөгсөд нь түүний хөшөөнд хүндэтгэл үзүүлж, цэцэг өргөлөө. АН-ын дарга С.Эрдэнэ хөшөөний дэргэд "Журмын нөхрийн зүтгэж явсан хүний эрх, эрх чөлөөг хамгаалахын төлөө Ардчилсан нам тууштай зүтгэнэ" гэдгээ мэдэгдэв.
АН-ын дарга С.Эрдэнэ:
-“Тун удахгүй Хэвлэлийн эрх чөлөөний өдөр тохионо. Гэвч Монгол Улсад хэвлэлийн эрх чөлөө гэдэг зүйл алга болжээ. Эрх мэдэлтнүүд сэтгүүлчдийг дарамталдаг, үг хэлэх үзэл бодлоо илэрхийлэх эрхэнд нь халдаж, бүр биед нь хүртэл халдаж байна. Энэ жил гэхэд л хамгийн олон сэтгүүлч Зөрчлийн хуулиар дуудагдсан байна. Тиймээс энэ бүхний эсрэг АН тэмцэнэ. Сэтгүүлчийг одоо Эрүүгийн хуулиар яллахаар болж, эрхзүйн орчныг дордууллаа.
Монгол хүний үг хэлэх, үзэл бодлоо илэрхийлэх, хэвлэн нийтлэх эрх чөлөөг бий болгохын тулд энэ хүний хийсэн, гүйцэтгэсэн үүрэг асар их. 1990 оны хүнд хэцүү цаг үед ардчилсан хөдөлгөөнийг удирдаж, зөв зохион байгуулж, нийгмийг өөрчилсөн хувьсгалыг удирдан зохион байгуулна гэдэг хэн хүнд заяадаг зориг биш. С. Зориг бол асар их үүрэг гүйцэтгэсэн хүн. Олон арван найз нөхдийн хамт ардчилсан хувьсгалыг амжилттай зохион байгуулж, өнөөгийн шинэ нийгмийг бий болгосон юм. Журмын нөхрийнхөө зүтгэж явсан энэ эрх, эрх чөлөөг хамгаалахын төлөө Ардчилсан нам тууштай тэмцэнэ” гэв.
