Хүнс, хөдөө аж ахуй, хөнгөн үйлдвэрийн сайд асан Б.Батзоригт холбогдох эрүүгийн хэргийн шүүх хурал хоёр өдрийн дараа (2020.04.22) Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд болно.

Нийслэлийн прокурорын газраас түүнийг ХХААХҮ-ийн сайдын албан тушаал хашиж байхдаа эрх мэдэл, албан тушаалын байдлаа урвуулан ашиглаж нийт есөн аж ахуйн нэгжид 8.6 тэрбум төгрөгийн урт хугацааны, хөнгөлөлттэй зээлийн санхүүжилт олгох шийдвэр гарган бусдад эдийн засгийн давуу байдал бий болгож, их хэмжээний хохирол учруулсан гэмт хэргийг зохион байгуулсан буюу Эрүүгийн хуулийн 22.1 дүгээр зүйлийн 3 дахь хэсэгт заасан гэмт хэрэгт буруутган яллах дүгнэлт үйлдэж, хэргийг хялбаршуулсан журмаар шийдвэрлүүлэхээр шүүхэд шилжүүлснээс хойш сар өнгөрөөд  байна. 

Уг хэргийг прокурорын байгууллага өнгөрөгч хоёрдугаар сарын 28-ны өдөр Баянзүрх дүүргийн Эрүүгийн хэргийн анхан шатны шүүхэд шилжүүлснээс хойш дөрвөн удаа шүүх хурал товлож, мөн хойшлуулсны эцэст өнгөрөгч баасан гаригт /2020.04.17/ түүнийг УИХ-ын гишүүнээс чөлөөллөө. Сайд асан түүнд холбогдох шүүх хурал хоёр дахь удаагаа хойшилсны дараа буюу энэ сарын 4-нд УИХ-ын гишүүнээс чөлөөлөгдөх хүсэлтээ УИХ-ын даргад өгсөн бөгөөд нууц санал хураалтад оролцсон 47 гишүүнээс 27 нь түүнийг чөлөөлөхийг дэмжсэн байна.

Хэрэв тэгээгүй бол сайд асан УИХ-ын гишүүний бүрэн эрхтэйгээ хамт шүүхийн яллах тогтоол уншуулж мэдэхээр байв. МАН-ын дарга У.Хүрэлсүх ч мөн өмнө нь МАН-ын генсекээр ажиллаж байхдаа “Хадгаламж банкны” хэргээр шүүхээс таван жилийн ял сонсож, Улсын дээд шүүх хүртэл давахдаа УИХ-ын гишүүний бүрэн эрхтэйгээ явсан байдаг. Хэрвээ Дээд шүүх түүнийг хэргийг хэрэгсэхгүй болгоогүй бол мань хүн УИХ-ын гишүүний бүрэн эрхтэйгээ шорон луу ачигдах байсан биз. ШШГГ-ийн хуягласан машин төрийн ордны гадна ирээд Дээд шүүхийн шийдвэрийг хүлээж байсан гэдэг юм билээ.

Харин Б.Батзоригийн хувьд түүнийг буруутгаж буй Эрүүгийн хуулийн 22.1 нь “нийтийн албанд томилогдох эрхийг 5-8 жил хүртэл хугацаагаар хасч,10,000-40,000 нэгжтэй тэнцэх хэмжээний төгрөгөөр торгох, эсхүл 2-8 жил хүртэл хугацаагаар хорих ял шийтгэх” ялтай. “Гэм буруугаа сайн дураараа хүлээн зөвшөөрч, хохирлоо нөхөн төлсөн” гэх прокурорын үндэслэл, хэргийг хялбаршуулсан журмаар шийдвэрлэх саналыг шүүх хүлээж авбал Б.Батзориг нь хорих ялаас чөлөөлөгдөж, нийтийн албанд томилогдох эрхээ хасуулж, торгууль төлөөд өнгөрөх боломжтой. /Өөрийн хамаарал бүхий “Тээвэр ачлал”, “Наму дэвжих” ХХК-иудад нийт 3 тэрбум төгрөгийн зээл авсан нь баримтаар нотлогдож, уг зээлээ эргүүлэн төлсөн/ Эцсийн шийдвэрийг шүүх гаргана.

Мөн түүний араас дахиад дөрвөн гишүүний бүрэн эрхийн асуудал УИХ-д орж ирэх магадлалтай. Г.Солтан, Д.Дамба-Очир нарын хэргийг прокуророос хянаад, шүүхэд шилжүүлсэн. Харин Б.Ундармаа, Л.Энхболд нарын хэргийг шалгах ажиллагаа үргэлжилж байгаа тухай прокурорын байгууллагаас мэдээлсэн. Нөхцөл байдал иймдээ хүрсэн болохоор дээрх нөхөд ч эрхтхэн өргөдлөө бичээд, зайгаа тавьчихвал нэгд хуулийн байгууллагын ажилд тустай, хоёрт удахгүй болох сонгуульд нь намдаа бага ч болов тус нэмэр юм даа. Тус нэмэр юу байхав, одоогийнхоосоо арай багахан гай болно оо л гэсэн үг.

Б.ЗАЯА