Чуулганы өнөөдрийн нэгдсэн хуралдаанаар найман асуудал хэлэлцэнэ. Үүнд УИХ-ын гишүүн Б.Батзоригийг УИХ-ын гишүүнээс чөлөөлөх, ХЭҮК-ын дарга Ж.Бямбадоржийг үүрэгт ажлаас нь чөлөөлөх тухай асуудлууд багтсан юм. 

ХЭҮК-ын дарга  Ж.Бямбадорж эрүүл мэндийн шалтгаанаар үүрэгт ажлаасаа чөлөөлөгдөх хүсэлтээ өгсөн бол УИХ-ын гишүүн Б.Батзориг өөрийн хүсэлтээр чөлөөлөгдөх өргөдлөө энэ сарын 3-ны өдөр өгсөн байна. Харин УИХ-ын гишүүн Б.Батзоригийн хувьд ЖДҮХС-гаас хууль зөрчиж хөнгөлөлттэй зээл олгосон хэргээр хуулийн байгууллагад шалгагдаж, хэрэг нь шүүхэд шилжээд байгаа билээ. 

Нийслэлийн прокурорын газраас Б.Батзоригийг ХХААХҮ-ийн сайдын албан тушаал хашиж байхдаа эрх мэдэл, албан тушаалын байдлаа урвуулан ашиглаж нийт есөн аж ахуйн нэгжид 8.6 тэрбум төгрөгийн урт хугацааны, хөнгөлөлттэй зээлийн санхүүжилт олгох шийдвэр гарган бусдад эдийн засгийн давуу байдал бий болгож, их хэмжээний хохирол учруулсан гэмт хэргийг зохион байгуулсан буюу Эрүүгийн хуулийн 22.1 дүгээр зүйлийн 3 дахь хэсэгт заасан гэмт хэрэгт яллах дүгнэлт үйлдэн хэргийг хялбаршуулсан журмаар шийдвэрлүүлэхээр шүүхэд шилжүүлээд байгаа. 

Эрүүгийн хуулийн 22.1 дүгээр зүйлийн 3 дахь хэсэгт нийтийн албанд томилогдох эрхийг 5-8 жил хүртэл хугацаагаар хасаж,10,000-40,000 нэгжтэй тэнцэх хэмжээний төгрөгөөр торгох, 2-8 жил хүртэл хугацаагаар хорих ял шийтгэхээр заасан байна.

ХЭҮК-ийн даргыг чөлөөлөх асуудлыг хэлэлцэх үеэр УИХ-ын гишүүн С.Жавхлан "Ж.Бямбадорж та Монгол түмэндээ уучлаарай гээд хэлчихсэн бол ахмад хүний хувьд, эр хүний хувьд сайхан байх байлаа. Боловсролтой, сайхан дүр эсгэсэн хүмүүсийг албан тушаал дээр тавьчихаар Монгол Улс хохироод байна. Дараа нь сэтгэлтэй, эрч хүчтэй, залуу хүн тавь. Нэг эмэгтэй бусдыг шоронд хийнэ гээд яриад сууж байсан. Дараа нь тэр хүнийг оруулж ирэх хэрэгтэй" гэв.

Гишүүд санал хэлж дууссаны дараа санал хураалтыг явуулснаар хуралдаанд оролцсон гишүүдийн 61.4 хувийн саналаар ХЭҮК-ын дарга Ж.Бямбадоржийг үүрэгт ажлаас нь чөлөөлөв. 

Мөн УИХ-ын гишүүн Б.Батзоригийг чөлөөлөх эсэх асуудлаар нууц санал хураалт явуулав. 

Энэ үеэр хэлэлцэж буй асуудалтай холбогдуулан УИХ-ын гишүүн О.Баасанхүү "Энэ хүн бол муу хүн биш. Эрх баригч нам нэг, нэг хүнээр туг тахихаа боль. Хэн нь ЖДҮ-дсэн, хэн нь 60 тэрбумдсан юм. Бүгд өргөдлөө өг л дөө. 49 ЖДҮ-чин өргөдлөө өгөөд сонгуульдаа шударга оролцоё гэж хүсч байна" гэв. 

Ийнхүү УИХ-ын дэгийн тухай хуулийн дагуу гишүүнийг чөлөөлөх асуудалд нууцаар санал хураалт явуулаж нууц санал хураалтад 47 гишүүн санал өгсөн бөгөөд 27 нь УИХ-ын гишүүн Б.Батзоригийг чөлөөлөхийг дэмжив.