Өргөдлийн байнгын хороо өчигдөрийн хуралдаанаараа банкууд ипотекийн зээлийн эргэн төлөлтийг хойшлуулах, иргэний хүсэлтийг ямар ч нотолгоо шаардахгүйгээр шийдвэрлэхээр болсон билээ. 

Энэ үеэр Өргөдлийн байнгын хорооны дарга М.Оюунчимэг: "Цар тахлын халдварын улмаас үүсч байгаа эдийн засгийн нөхцөл байдалтай холбогдуулан Монголбанкнаас гаргасан хэрэглээний, ипотекийн зээлийн эргэн төлөлтийн хугацааг хойшлуулах шийдвэр хэрэгжихгүй байгаа болон иргэдэд ойлгомжгүй байдал үүсгэж хүндрэл учруулж байна. Бид ямар шийдвэр гаргаж байж нэг ойлголтоор иргэддээ хүрч үйлчлэх юм бэ гэдэг талаар нэгдсэн нэг ойлголт өгөх хэрэгтэй. 

Иргэдийн нийт зээлийн 90 хувь нь хэрэглээний, ипотекийн зээл байна. 

Шийдвэрийн талаар иргэд, байгууллагууд нэгдсэн ойлголтгүй байгаа учир мэдээллийг цэгцтэй, тодорхой болгох хэрэгтэй" гэлээ. 

Мөн тэрээр зээлээ төлж чадаагүй иргэдээс санал, хүсэлт ирснийг танилцуулаад, банкны захирлуудад хандан "Энэ хүнд үед та бүхэн эх орон ч байх хэрэгтэй, тэтгэврээрээ амьдардаг иргэд маш их байгаа. Хамтран зээлдэгч гээд данснаас нь шууд таталт хийхийн оронд, эхлээд сануулах эсвэл зургаан сараар зээлийн хойшлуул. Үүнд эрх зүйн асуудал байвал Төв банктайгаа ярилцаад, зохицуулалтаа хийгээд оруулаад ирвэл бид цаг алдалгүй шийдээд өгнө" гэв.

Ипотекийн зээлийн эргэн төлөлтийн хугацааг хойшлуулахтай холбоотой иргэдэд үүсэж буй хүндрэл, ойлгомжгүй байдлыг арилгах зорилгоор Монголбанк нэгдсэн байдлаар дагаж мөрдөх журмыг гарган арилжааны банкуудаар мөрдүүлэх, хэрэглээний зээлийн эргэн төлөлтийн хугацааг хойшлуулах хугацаанд тооцох хүүгийн төлбөрийг иргэдэд хэт дарамт учруулахгүй байхаар аргачлалыг боловсруулж тус журамд тусгах, ипотекийн зээлтэй иргэд арилжааны банкуудад зээлийн эргэн төлөлтөө хойшлуулах хүсэлт гаргавал банкуудад хэт ачаалал үүсгэхгүй, иргэдэд хүндрэлгүй байхаар оновчтой зохион байгуулахыг үүрэг болголоо. 

Мөн шаардлагатай тохиолдолд хууль, эрх зүйн орчинд өөрчлөлт оруулах саналыг УИХ-д ирүүлэх зэргээр ажиллахыг чиглэл болгов.