УИХ-ын гишүүн Б.Пүрэвдорж өнгөрсөн оны арванхоёрдугаар сард Нэмэгдсэн өртгийн албан татварын тухай хуульд өөрчлөлт оруулах тухай хуулийн төсөл өргөн барьсан билээ.

Хуулийн төсөлд Монгол Улсын нутаг дэвсгэрт борлуулсан бүх төрлийн бараа, ажил, үйлчилгээ болон гадаад улсаас Монгол Улсад импортоор оруулсан бүх төрлийн бараа, ажил, үйлчилгээний борлуулалтын үнэлгээнд ногдуулдаг 10 хувийн татварыг 5 хувь болгон бууруулахаар тусгажээ.

Ингэснээр орлого цуглуулах чадварын үзүүлэлт сайжирч, татвар төлөгчдийн бааз нэмэгдсэнээр эдийн засагт болон татвар төлөгчдөд эерэг нөхцөл байдал бий болохоос гадна улсын төсөвт цугларах татварын орлого буурахгүй байх боломжтой гэдгийг УИХ-ын гишүүн Б.Пүрэвдорж онцолж байсан. 

Тэрээр өнөөдөр уг хуулийг яаралтай хэлэлцэж, батлах ёстойг дахин сануулж Төрийн ордонд мэдээлэл хийлээ.

УИХ-ын гишүүн Б.Пүрэвдорж: "Монгол улсын ерөнхийлөгч Х.Баттулга өчигдөр чуулганы нээлт дээр миний санаачилсан НӨАТ-ыг буулгах хуулийн төслийг дэмжиж үг хэлсэн. Та бүхэн харсан байх. Эдийн засгийн хүндрэлтэй, орлого буурсан байна. ЖДҮ, ААН-үүд хаагдаж, ажилчиддаа цалин тавих чадамж буурч цомхтгож байна. Энэ үед НӨАТ-ыг буулгах нь хамгийн чухал. Иргэдэд нэн тааламжтай хуулийг яаралтай батлах хэрэгтэй байна. Татварыг 5 хувь болгох зайлшгүй шаардлага тулгарч байна. 

НӨАТ-ыг 10 хувь өнгөрсөн хугацаанд эдийн засаг, санхүүгийн байдалд үр дүнгээ өгсөн. Энэ татвар нь орлогыг бүртгэх үүргээ хангалттай биелүүлсэн гэж үзэж байна.

Өнөөдөр жирийн иргэн хүн дэлгүүрээс 100 мянган төгрөгийн хүнс авахад 110 мянган төгрөгийг төлж байгаа. Энэ нь орлого буурсан иргэдэд маш хүнд тусч байна. Энэ хууль хэрэгжсэнээр ялангуяа алслагдмал бүс нутагт өндөр өртөгтэй бараа бүтээгдэхүүн худалдан авдаг иргэдэд маш чухал хууль болно" гэлээ.